पश्चिम बंगालमा सत्ता फेरिएपछि रानी नाकामा कडाइ, परिचयपत्र अनिवार्य

विराटनगर । स्थानीय प्रशासनले विराटनगरकाे रानी नाका हुँदै नेपाल प्रवेशमा कडाइ गरेको छ । भारतको बंगालमा सत्ता फेरिए लगतै भारतकाे जोगवनी हुँदै विराटनगरकाे रानी नाकामा कडाइ गरिएको हो ।

नाकामा नेपाल प्रवेशका लागि परिचयपत्र अनिवार्य गरिएको छ । पूर्वी नाका काकडभिट्टामा भने विगतदेखि परिचयत्र अनिवार्य थियाे ।

भारतसँग सीमा जाेडिएका सबै क्षेत्रमा सतर्कता बढाइएकाे काेशी प्रदेश प्रहरी प्रमुख डिआइजी विनाेद घिमिरेले बताए । उनका अनुसार राेहिङ्ग्या शरणार्थी नेपाल प्रवेश गर्न सक्ने आशंकामा सीमा क्षेत्रमा उच्च सतर्कता अपनाइएकाे हाे । ‘सीमा क्षेत्रमा रहेका सबै प्रहरी युनिटले सतर्कता बढाएका छन्,’ उनले भने,’ नेपाल प्रवेशका लागि परिचयपत्र अनिवाय छ ।’

भारतको पश्चिम बंगालमा ममता बनर्जीको १५ वर्षे शासन अन्त्य गर्दै भाजपाका शुभेन्दु अधिकारी मुख्यमन्त्री बनेका छन् । अधिकारी कट्टर हिन्दुवादी नेता हुन् । उनी मुख्यमन्त्री बनेपछि म्यानमारबाट बंगलादेश हुँदै पश्चिम बंगालमा शरण लिइरहेका रोहिङ्ग्या शरणार्थीले शिविर छाड्न थालेपछि नेपाल प्रवेश गर्ने आशंकामा नाकामा कडाइ गरिएको हो ।

यसअघि प्रहरी प्रधान कार्यालयले भारतसँग सीमा जाेडिएका सबै जिल्लामा सतर्कता अपनाउन सर्कुलर जारी गरेकाे थियाे ।

नाकामा खटिएका सुरक्षाकर्मीले नेपाल आउनेलाई आउने कारण पनि सोधिरहेका छन् । नाकामा सशस्त्र प्रहरी र जनपद प्रहरीको संयुक्त टोली परिचालन गरिएको छ । सुरक्षा जाँचका लागि तालिमप्राप्त कुकुर पनि परिचालन गरिएको छ ।

भारतकाे कलकत्ताबाट हरेक तीन दिनमा जोगवनीसम्म रेल आउँछ । रेल र सडकको बाटो हुँदै पश्चिम बंगालमा रहेका रोहिग्या नेपाल प्रवेश गर्ने सम्भावना रहेकाे प्रहरी स्राेत बताउँछ ।

दुई देशको सिमानामा हुने अवैध घुसपैठ र गैरकानुनी गतिविधि नियन्त्रण गर्न नेपाल प्रवेशका लागि परिचयपत्र अनिवार्य गरिएको प्रमुख जिल्ला अधिकारी युवराज कट्टेलले बताए । ‘ सीमा सुरक्षाा हाम्राे नियमित ड्युटी हाे, सीमा क्षेत्रमा हुनसक्ने अवान्छित गतिविधि र भारतीय बजारमा निर्भर हुने प्रवृतिलाई राेक्नका लागि कडाइ गरिएकाे हाे,’ उनले भने,’ माेरङ जिल्लाका सबै नाकामा परिचयपत्र अनिवार्य गरिएकाे छ ।’