केन्द्रले अध्यादेश ल्याउँदा विरोध गर्ने कोशीले पनि ल्यायो अध्यादेश

विराटनगर । कोशी प्रदेश सरकारले पनि अध्यादेश जारी गर्ने निर्णय गरेको छ । बजेट अधिवेशनका लागि संसद आह्वान गर्ने समय नजिकिएको अवस्थामा सोमबार बसेको मन्त्रीपरिषद् बैठकले प्रदेश खेलकुद ऐन पहिलो संशोधन अध्यादेश २०८३ जारी गर्ने निर्णय गरेको हो ।

प्रदेश सरकारको सिफारिसमा प्रदेश प्रमुखले अध्यादेश जारी गर्नेछन् ।

बालेन्द्र शाह नेतृत्वको सरकारले संसदको अधिवेशन रोकेर अध्यादेश जारी गर्दा कोशी प्रदेशका मुख्यमन्त्री हिक्मतकुमार कार्कीले विरोध गरेका थिए । तर, उनकै नेतृत्वमा सोमबार बसेको बैठकले अध्यादेश जारी गर्ने निर्णय गरेको हो । ‘सरकारले आवश्यकताका आधारमा अध्यादेश ल्याउन पाउने संबैधानिक अधिकार नै हो ,’ सरकारको निर्णयको विरोध गर्दै उनले सामाजिक सञ्जालमा लेखेका थिए,‘तर आफू प्रतिपक्ष वा सरकारमा नहुँदा चर्को बिरोध गर्ने र सरकार हुँदा बोलाइएको संसद्  भोलि पल्ट्नै पुन रोकी अध्यादेश ल्याउने कुरा चै अपरिपक्व र गैह्र जिम्मेवारसमेत हो ।’

प्रदेश सरकारका प्रवक्ता आन्तरिक मामिला तथा कानुन मन्त्री इन्द्रमणी पराजुलीका अनुसार सरकारको कामकारवाहीलाई प्रभावकारी बनाउनका लागि अध्यादेश जारी गर्ने निर्णय भएको हो । प्रदेश खेलकुद बोर्डको सदस्यसचिव गत कात्तिकदेखि रिक्त छ । रिक्त रहेको स्थानमा नयाँ सदस्य सचिवको नियुक्ती प्रक्रिया र बजेट खर्च गर्ने प्रक्रीयालाई सहज बनाउनका लागि अध्यादेश जारी गर्ने भएको स्रोतले बताएको छ । ‘बजेट कार्यान्वयनको बेला छ, सदस्यसचिवको नियुक्तीदेखि केही समस्याका कारणले बजेट कार्यान्वयन भएको छैन,’ मन्त्री पराजुलीले भने,‘ त्यसैका लागि फास्ट ट्रयाकबाट गर्न खोजिएको हो ।’