सार्वजनिक शौचालयमा पुस्तकालय र कफी सप

विराटनगर । मोरङको सुन्दरहरैंचा नगरपालिकामा सार्वजनिक शौचालयप्रतिको परम्परागत दृष्टिकोणलाई परिवर्तन गर्न ‘मल्टिपर्पस’ नमुना शौचालय सञ्चालनमा ल्याइएको छ । महेन्द्र राजमार्गसँगै जोडिएका विराटचोक र सलकपुरमा निर्माण गरिएका याे आधुनिक भवनहरू हेर्दा कुनै व्यावसायिक कम्प्लेक्सभन्दा कम देखिँदैनन् । दुईतले भवनमा सफा शौचालय छन् । नुहाउने कोठा , कफी शप, सैलुन र फेन्सी पसलसमेत सञ्चालनमा छ ।

विशेष आकर्षणका रूपमा सार्वजनिक पुस्तकालयको व्यवस्था गरिएको छ, जहाँ बसेर विद्यार्थी तथा पाठकहरूले पुस्तक पढ्न सक्छन् । फरक क्षमता भएका व्यक्तिका लागि छुट्टै व्यवस्था, मोबाइल चार्जिङ स्टेसन र २ रुपैयाँको सिक्का हालेर ‘स्यानिटरी प्याड’ लिन सकिने मेसिनसमेत राखिएको छ ।

यी शौचालयलाई ‘पब्लिक-प्राइभेट पार्टनरसिप’ मोडलमा सञ्चालन गरेको छ । भवनका सटरहरूबाट आउने भाडाले सरसफाइ कर्मचारीको पारिश्रमिक र पुस्तकालयको खर्च धान्ने गरिन्छ । शौचालयको नियमित सरसफाइका लागि त्यहीँ एक परिवारलाई बसोबासको सुविधासहित जिम्मेवारी दिइएको छ ।

नगर प्रमुख केदारप्रसाद गुरागाईंका अनुसार नगरपालिकाले यस्ता ८ वटा नमुना शौचालय बनाउने लक्ष्य राखेको छ । करिब १५ करोड कुल लागत अनुमान गरिएको यस परियोजनामा नगरपालिकाको ३५ प्रतिशत र निजी क्षेत्र तथा दातृ निकायको ६५ प्रतिशत लगानी रहनेछ। हाल विराटचोक र सलकपुरमा सेवा सुरु भइसकेको छ भने बलिया, गछिया, गोठगाउँ लगायतका ५ स्थानमा निर्माण कार्य तीव्र गतिमा अघि बढेको छ। साैचालय निर्माणमा सहयाेग गरेका भोलाप्रसाद दुलाल भन्छन्, ‘हामी सार्वजनिक शौचालयप्रतिको आम धारणा बदल्दै यसलाई सेवा, ज्ञान र व्यवसायको साझा केन्द्र बनाउन चाहन्छौं।’