विराटनगरकाे नमुना बस्तीमा खोला किनारका सुकुम्वासीलाई घरजग्गा

विराटनगर । हिजोसम्म खोलाको किनारमा पराल र बाँसकाे झुुप्रा हालेर बस्ने विराटनगर महानगरपालिका–१२, मनलवाकी कौशिला ऋषिदेवसहितकाे परिवार अहिले आफ्नै घरमा बस्छन् ।

केसलिया खाेलामा हरेक वर्ष बर्खा लाग्नेबित्तिकै खोलाको बाढीका कारण डुबानमा पर्ने घर छाड्न बाध्य मनलवाका ८५ सुकुम्वासी परिवार अहिले आफ्नै नमुना घरमा बस्छन् । ६० परिवारकाे घर निर्माण भइरहेकाे छ ।

मनलवा टाेलका १४५ विपन्न ऋषिदेव परिवारको जीवन अहिले फेरिएको छ । उनीहरू अहिले आफ्नै घर-जमिनको मालिक बनेका छन् ।

विराटनगर महानगरपालिकाको पहलमा जीवन विकास लघुवित्त वित्तीय संस्थासहितकाे संयुक्त प्रयासले १४५ सुकुम्वासी परिवारकाे जीवन फेरिएकाे हाे । सुकुम्वासीलाई जग्गा धनी बनाउनका लागि निर्माण भएकाे याे वस्तीलाई ‘सम्पन्न बस्ती’ नाम दिइएको छ ।

यो बस्तीमा बन्ने घरहरू एकै शैली र रङका छन् । घरभित्र दुईवटा कोठा, एउटा भान्सा र बाहिर बरन्डासहित व्यवस्थित चर्पी र स्नानगृह निर्माण गरिएको छ ।

‘ह्याविट्याट नेपाल’को प्राविधिक सहयोगमा ‘ट्रिटमेन्ट’ गरिएको बाँस, बालुवा र सिमेन्टको प्रयोग गरी घरहरू बनाइएका छन् । बस्तीभित्र बालबालिकाका लागि खेल्ने चौर, ज्येष्ठ नागरिक विश्रामस्थल र सामुदायिक भवन समेत निर्माण गरिँदैछ ।

सुकुम्वासी समस्याको दिगो समाधानका लागि प्रतिपरिवार १० धुर जग्गा उपलब्ध गराइएकाे छ । १४५ परिवारलाई १० धुरका दरले जग्गा उपलब्ध गराउन् जीवन विकास लघुवित्तले सस्तो ब्याजमा ऋण दिएको थियो । जीवन विकासबाट एकमुष्ट ऋण लिएर जग्गा किनेका सुकुम्वासी जग्गा धनी भएपछि सानाे–सानाे किस्तामा ऋण तिर्दैछन् । विराटनगर महानगरपालिका ह्यावीटाट, साहारा नेपालसहितका संस्थाले घर निर्माण गरिदिएका हुन् ।

सम्पन्न वस्तीमा एउटा घर बनाउन करिब ६ लाख ५० हजार रुपैयाँ खर्च भएको छ । सुकुम्वासी व्यवस्थापनमा सम्पन्न बस्तीलाई नमुना माेडल मानिएकाे छ ।