डोजर आतंकको त्रासले सडकमा सुकुमवासी

विराटनगर । मोरङका विभिन्न स्थानमा सुकुमवासी परिवार सडकमा उत्रिएका छन् । नयाँ सरकार गठन भएलगतै काठमाडौँका सुकुमवासी बस्तीमा डोजर चलाइएको र नेपाली सेनाले देशभरका सुकुमवासीको विवरण माग गरेपछि मोरङका सुकुमवासी सडकमा उत्रिएर प्रदर्शन गरेका हुन् ।

सोमबार मोरङका सुन्दरहरैँचा, लेटाङ क्षेत्रका भूमिहीन तथा अव्यवस्थित बसोबासीले शान्तिपूर्ण रूपमा प्रदर्शन गरेको गरेको प्रहरीले बताएको छ । आइतबार सुकुमवासीले पथरीशनिश्चरे नगरपालिकाको पथरीमा प्रदर्शन गरेका थिए ।

बाघझोडा सुकुम्वासी संरक्षण संघर्ष समिति सुन्दरहरैँचाले प्रदर्शनपछि नगरपालिका कार्यालयमा ज्ञापनपत्र पनि बुझाएको छ । नेपाल बसोबास बस्ती संरक्षण समाज र श्रम संस्कृति पार्टी नगर समितिले लेटाङमा र्‍याली निकालेर नगरपालिकामा ज्ञापनपत्र बुझाएको थियो । आइतबार पथरीका सुकुमवासीले पनि स्थानीय पालिकामा बस्ती खाली गर्न नहुने भन्दै ज्ञापन पत्र बुझाएको थियो ।

‘डोजर आतंक बन्द गर’, ‘सुकुम्वासीलाई लालपुर्जा दे’, ‘विस्थापन होइन व्यवस्थापन गर’जस्ता नारा लगाउँदै सडकमा उत्रिएका उनीहरूले सरकारको पछिल्लो कदमको विरोध जनाए ।

राष्ट्रिय भूमि आयोगमा मोरङबाट ८ हजार ९१९ भूमिहीन दलित, १८ हजार ५६१ सुकुमवासी र ४० हजार २५३ अव्यवस्थित बसोबासी गरी झण्डै ८० हजार परिवार जग्गाधनी पुर्जाका लागि निवेदन दिएका छन् ।