नर्समाथि अभद्र व्यवहार भएपछि प्रहरीमा उजुरी

विराटनगर । नोबेल शिक्षण अस्पतालमा उपचारका क्रममा एक जना बिरामीको मृत्यु भएपछि अस्पतालमा कार्यरत नर्समाथि अभद्र व्यवहार भएकाे घटना सार्वजनिक भएको छ ।

घटनासम्बन्धी भिडियो सामाजिक सञ्जालमा भाइरल बनेपछि नेपाल नर्सिङ संघ मोरङले दोषीमाथि कारबाहीको माग गर्दै नेपाल प्रहरीको साइबर ब्यूरोमा उजुरी दिएकाे छ । संघकी मोरङ अध्यक्ष लजिता योञ्जनले सामाजिक सञ्जालमार्फत जानकारी दिँदै अस्पतालमा कार्यरत नर्सिङ स्टाफलाई लक्षित गरी गालीगलौज र धम्की दिइएको घटनामा संलग्नलाई कारवाहीकाे माग गर्दै निवेदन दिएकाे बताइन् ।

अस्पतालको पोस्ट–अपरेटिभ वार्डमा कार्यरत नर्समाथि शुक्रबार बिरामी कुरुवाहरूले अपशब्द प्रयोग गर्दै दुर्व्यवहार गरेका थिए । घटनापछि आइतबार अस्पताल प्रशासन, मेट्रोन तथा नर्सिङ स्टाफबीच संयुक्त छलफल गरिएको थियो ।

जिल्ला प्रहरी कार्यालय मोरङका अनुसार उक्त विवाद बिरामीको मृत्यु पछि उत्पन्न भएको हो । डीएसपी कोपिला चुँडालले सार्वजनिक भिडियोप्रति स्वास्थ्य तथा जनसंख्या मन्त्रालयले समेत चासो दिएको बताइन् ।

प्रहरीका अनुसार मृगौलाको पथरीको शल्यक्रियापछि मोरङको सुन्दरहरैँचा नगरपालिका–१० का ५४ वर्षीय नेत्रप्रसाद भण्डारीको मृत्यु भएको थियो । त्यसपछि अवस्था जटिल बनेको र सोही क्रममा मृत्यु भएको बताइएको छ । भण्डारीको मृत्यु भएपछि आक्रोशित आफन्तले स्वास्थ्यकर्मीमाथि दुर्व्यवहार भएकाे थियाे । घटनापछि कोशी अस्पतालमा पोस्टमार्टम गरेर मृतकको शव परिवारलाई बुझाइएको प्रहरीले जनाएको छ ।