नेपाललाई भारतकाे जवाफ : ‘लिपुलेक पुरानै बाटाे हाे’

काठमाडौं । लिपुलेक हुँदै कैलाश मानसरोवर जानेबाटो नयाँ नभएको भारतले नेपाललाई जवाफ फर्काएकाे छ ।

भारतले कैलाश मानसरोवर जानका लागि भारत र चीनले नेपाली भूभाग लिपुलेक हुँदै मार्ग खुला गर्ने घोषणा गरेको विषयमा नेपाल सरकारले कूटनीतिक नोट पठाएकाे थियाे । जसकाे जवाफ फर्काउँदै भारतले लिपुलेक हुँदै मानसराेवर यात्रा पुरानाे बाटाे भएकाे बताएकाे हाे ।

भारतको विदेश मन्त्रालयका प्रवक्ता रन्धिर जैसवालले भारतको धारणा सधैं स्पष्ट र स्थिर रहेको बताएका छन् । उनले भनेका छन्, ‘लिपुलेक पास हुँदै जाने कैलाश मानसरोवर यात्रा सन् १९५४ देखि निरन्तर चलिरहेको पुरानो मार्ग हो र यो कुनै नयाँ विषय होइन ।’

भारतले नेपालका केही भू–भाग सम्बन्धी दाबीहरू ऐतिहासिक तथ्य र प्रमाणमा आधारित नभएको भन्दै त्यस्ता एकतर्फी दाबी अस्वीकार्य रहेको पनि बताएको छ ।

भारतले द्विपक्षीय सम्बन्धका सबै विषयहरूमा, विशेष गरी सीमा विवाद समाधानका लागि, संवाद र कूटनीतिमार्फत नेपालसँग रचनात्मक छलफल गर्न तयार रहेको पनि जनाएको छ ।

आइतबार नेपालकाे परराष्ट्र मन्त्रालयले दुवै देशलाई कूटनीतिक नोट पठाएर लिपुलेककाे विषयमा ध्यानाकर्षण गराएको  थियाे ।