चार स्थानमा जीवन विकासकाे वित्तीय साक्षरता कार्यक्रम

विराटनगर । सदस्यकाे घरदैलाेमा पुगेर वित्तीय सेवा प्रवाह गर्दै आएकाे जीवन विकास लघुवित्त वित्तीय संस्थाका चार शाखाले एकै दिन केन्द्र प्रमुख गाेष्ठी तथा वित्तीय साक्षरता कार्यक्रम सम्पन्न गरेका छन् । बुधबार संस्थाको शाखा कार्यालय रामचोक, ढल्केबर, केराबारी र राजविराजले केन्द्र प्रमुख गाेष्ठी तथा वित्तीय साक्षरता कार्यक्रम सम्पन्न गरेका हुन् ।

कार्यक्रम मार्फत चारवटै शाखाले आ-आफ्नो कार्यक्षेत्रका ५–५ जना अतिविपन्न परिवारका बालबालिकाहरूको शैक्षिक अभिभावकत्व ग्रहण गरेका छन् । ती बालबालिकाहरूलाई विद्यालय जान प्रोत्साहन मिलोस् भन्ने उद्देश्यले संस्थाले झोला, कापी, कलमलगायतका आवश्यक शैक्षिक सामग्रीहरू उपलब्ध गराएको छ । विपन्न समुदायका बालबालिकालाई शिक्षाको मूलधारमा ल्याउन लघुवित्तका हरेक शाखाले अभिभावकत्व ग्रहण गर्दै आएका छन् ।

संस्थामा आबद्ध भई अनुशासित रूपमा कारोबार गर्ने र व्यवसायमा प्रगति गर्ने सदस्यहरूलाई प्रोत्साहन गर्न संस्थाले उत्कृष्ट ऋणी, उत्कृष्ट बचतकर्ता, उत्कृष्ट उद्यमी सदस्य र उत्कृष्ट केन्द्रहरूलाई पुरस्कृत पनि गरेकाे छ । कार्यक्रममा सहभागीहरूलाई कर्जाको सदुपयोगिता, बचतको महत्त्व, पारिवारिक बजेट व्यवस्थापन र डिजिटल बैंकिङका बारेमा साक्षरता प्रदान गरिएको थियो ।

जीवन विकासले वित्तीय कारोबारसँगै शिक्षा, स्वास्थ्य र सामाजिक सचेतनाका क्षेत्रमा काम गर्दै आएको छ ।