क्रिकेट रगंशाला खाली गर्न त्रिभुवन विश्वविद्यालयकाे अल्टिमेटम

काठमाडौं । विश्वविद्यालयकाे हाताभित्र रहेको क्रिकेट रगंशाला खाली गर्न त्रिभुवन विश्वविद्यालयले ३५ दिनको अल्टिमेटम दिएको छ । अतिक्रमित जग्गा फिर्ता ल्याउने भन्दै गत ४ वैशाखमा त्रिविले ३५ दिनको सूचना जारी गरेकाे हाे । विश्वविद्यालयले रंगशालासहित अन्य क्षेत्रमा अतिक्रमण गरेकाे जमिन पनि छाड्न भनेकाे छ ।

३५ दिने सूचनापछि जसले त्रिविको जग्गा प्रयोग गरेका छन् ती सबै निकायलाई छुट्टाछुट्टै पत्रचार गरी खाली गर्न भनेको छ । त्रिवि, रजिस्ट्रार कार्यालयको सामान्य प्रशासन महाशाखाले नेपाल क्रिकेट संघ क्यानलाई पनि पत्र काटेको हाे ।

‘अतिक्रमित जग्गा फिर्ता ल्याउने काम अन्तर्गत सबै निकायलाई पत्र काटेका छौं । क्यानलाई पनि पत्र पठाएको छ,’ प्रशासन महाशाखाले भनेकाे छ, ‘क्यानसँगको सम्झौता यही मसान्तबाट सकिँदैछ ।’

सामान्य प्रशासन महाशाखा प्रमुख राजबहादुर राईले १८ वटा संघ, संस्था र संगठनलाई ३५ दिनभित्र खाली गर्न पत्र काटिएको जानकारी दिए ।

सरकारले पनि त्रिवि मैदानलाई अन्तर्राष्ट्रियस्तरको क्रिकेट रंगशाला निर्माणको गुरुयोजना स्वीकृत गरेर काम गरिरहेकाे छ । तत्कालीन प्रधानमन्त्री सुशीला कार्की नेतृत्वको सरकारले गुरुयोजना स्वीकृत भएको थियो । गुरुयोजना बमोजिम रंगशाला निर्माण गर्न करिब १० अर्ब रुपैयाँ लाग्ने अनुमान गरिएको छ । यसअघिका सरकारले पनि क्रिकेट मैदान निर्माणमा लगानीसहितको काम अघि बढाएका थिए । तर त्रिविले मैदान खाली गर्न भनेपछि बाँकी निर्माण प्रक्रिया अन्यौलमा परेको छ । त्रिविको जग्गा खोजबिन समितिको प्रतिवेदन २०८१ अनुसार कीर्तिपुरमा मात्रै करिब १ हजार रोपनी जग्गा अतिक्रमण भएको छ ।