लेटाङमा प्रहरीले सुरु गर्याे ड्रोनबाट निगरानी

विराटनगर । मोरङको इलाका प्रहरी कार्यालय लेटाङले ड्रोन प्रविधिको प्रयोग सुरु गरेको छ । लेटाङ क्षेत्रमा अपराध अनुसन्धान र आपतकालीन उद्धार कार्यलाई प्रभावकारी बनाउने भन्दै ड्रोन प्रविधिको प्रयोग सुरु गरेको हो ।

शुक्रबार इलाकाले सुरु गरेको ड्रोन प्रविधिको उद्घाटन कोशी प्रदेश प्रहरी प्रमुख, प्रहरी नायव महानिरीक्षक बिनोद घिमिरेले ड्रोन प्रविधि प्रयोगको समुद्घाटन गरे । जिल्लामा इलाका तहले ड्रोनको प्रयोग सुरु गरेको पहिलो पटक हो । यसअघि सोही इलाकाले हिरासत लाइबेरी सुरु गरेको थियो ।

ड्रोन प्रविधिको उद्घाटन गर्दै घिमिरेले आधुनिक प्रविधिको प्रयोगले प्रहरीको कार्यक्षमतामा गुणात्मक सुधार ल्याउने बताए । ‘दुर्गम र भौगोलिक रूपमा जटिल क्षेत्रमा ड्रोनको प्रयोगले प्रभावकारी निगरानी र खोज–उद्धारमा मद्दत पुग्नेछ,’ उनले भने,‘ यसले अपराध जहाँ भए पनि प्रहरीको निगरानीबाट उम्कन सकिँदैन भन्ने स्पष्ट सन्देश प्रवाह गरेको छ ।’

मोरङ प्रहरी प्रमुख प्रमुख, प्रहरी उपरीक्षक कवित कटुवालले प्रविधिमैत्री सुरक्षा प्रणालीलाई सफल बनाउन स्थानीय तह, नागरिक समाजको भूमिका महत्त्वपूर्ण हुने बताए ।

इलाका प्रहरी कार्यालय लेटाङका प्रमुख, प्रहरी निरीक्षक सागर साहले लेटाङको चुनौतीपूर्ण भूगोल र बढ्दो सुरक्षा संवेदनशीलतालाई मध्यनजर गर्दै ड्रोन प्रविधि प्रयोगमा ल्याएको बताए । यो ड्रोनलाई दैनिक गस्ती, ट्राफिक व्यवस्थापन, वन क्षेत्रको निगरानी र आपतकालीन घटनामा प्रयोग गरिने उनले बताए ।