फुटपाथ खाली गर्न विराटनगरको अभियान शुक्रबारदेखि

विराटनगर । विराटनगर महानगरपालिकाले बजार क्षेत्रमा भएको फुटपाथ अतिक्रमण हटाउने अभियान शुक्रबारबाट सुरु गर्ने भएको छ । मुख्य बजार र आसपासका क्षेत्रको अतिक्रमण हटाउन शुक्रबारबाट अभियान सुरु गर्ने भएको हो ।

अभियानअन्तर्गत पसलको सटर बाहिर कुनै पनि व्यापारिक सामग्री राख्न पाइने छैन । सडकपेटीमा निर्माण सामग्री थुपार्न, मोटरसाइकल ग्यारेजका सामान बाहिर निकाल्न र मापदण्डविपरीत कवाडी व्यवसाय सञ्चालन गर्न निषेध गरिएको महानगरले जनाएको छ ।

यसअघि महानगरले दुई दिनसम्म माइकिङ गरेर व्यवसायी र सर्वसाधारणलाई सचेत गराइसकेको छ ।

फुटपाथ व्यवस्थापनसँगै महानगरले सिंघिया र केशलिया खोलामा भइरहेको अवैध उत्खनन् कार्यलाई पनि कडाइका साथ रोक्ने भएको छ ।

दीर्घकालीन रूपमा ट्राफिक जाम र पार्किङको समस्या समाधान गर्न महानगरले उच्चस्तरीय समितिसमेत गठन गरेको छ । सरसफाई शाखा प्रमुख पुनमकुमार दाहालको संयोजकत्वमा गठित समितिमा ट्राफिक प्रहरी, मोरङ उद्योग व्यापार संघ, खुद्रा व्यापार संघ र नगर प्रहरीका प्रतिनिधि रहेका छन् । समितिले ठेला व्यवस्थापन र पार्किङ क्षेत्र निर्धारणसम्बन्धी प्रतिवेदन १५ दिनभित्र पेश गर्नेछ ।

महानगरका मेयर नागेश कोइरालाले व्यवस्थित, सफा र सुरक्षित विराटनगर निर्माणका लागि यो कदम चालिएको बताए ।