सीमामा नाकामा कडाइ: ‘सयभन्दा माथिकाे सामान ल्याउँदा भन्सार तिर्नु’

विराटनगर । नयाँ सरकार बनेपछि नेपाल–भारत सीमा क्षेत्रमा हुने तस्करी नियन्त्रण गर्न सुरक्षा निकायले निगरानी बढाएका छन् ।

विराटनगरको रानीस्थित दशगजा क्षेत्रका केही घरभित्रैबाट भारततर्फ सामान ओसारपसार गर्न बनाइएका ‘गुप्त मार्ग’ (ढोका) फेला परेपछि प्रशासनले तिनलाई बन्द गराएको छ ।

मोरङका प्रमुख जिल्ला अधिकारी युवराज कटेलका अनुसार तस्करीका लागि प्रयोग गरिएका यस्ता संरचना बन्द गराइएकाे छ । सीमामा सुरक्षा उपस्थिति बढाइएको  उनले बताए ।

प्रहरीले विशेष अपरेसनमार्फत राजस्व चुहावट रोक्न र अवैध कारोबार नियन्त्रण गर्न सक्रियता देखाएको छ ।

कोशी प्रदेशका प्रहरी प्रमुख डीआईजी विनोद घिमिरेले सीमा नाकाबाट एक सय रुपैयाँभन्दा बढीको सामान ल्याउँदा अनिवार्य भन्सार तिर्नुपर्ने व्यवस्था कडाइका साथ लागू गरिएको जानकारी दिए ।

अवैध आयातले स्थानीय बजार र राजस्वमा गम्भीर असर पुर्‍याइरहेकाले गृह मन्त्रालयको निर्देशनअनुसार सीमामा नियमित गस्ती र जाँचलाई बढाइएकाे हाे ।