विराटनगरमा ११ लाख मूल्यका तस्करीका सामान बरामद

विराटनगर । प्रहरीले विराटनगरबाट तस्करी गरेर ल्याइएको ११ लाख ११ हजार ५ सय ५५ रुपैयाँ मूल्य बराबरको कपडा र हरियो मटर बरामद गरेको छ । भारतबाट भन्सार छली गरी ल्याइएका यी सामान विराटनगर–६ बाट आइतबार बरामद गरेको हो ।

सामान ओसारपसारमा प्रयोग गरिएका को २ ह ३२४५ र को २ ह ३५८९ नम्बरका दुईवटा टेम्पो पनि प्रहरीले नियन्त्रणमा लिएको छ । प्रहरीलाई देख्नासाथ चालकहरू भने टेम्पो छाडेर फरार भएका छन् ।

बरामद गरिएका सामग्री र टेम्पोलाई आवश्यक कारबाहीका लागि विराटनगर भन्सार कार्यालयमा बुझाइएको मोरङ प्रहरीका डीएसपी लीलाराज लामिछानेले जानकारी दिए ।

मोरङ प्रहरी प्रमुख एसपी कवित कटवालले सीमा क्षेत्रमा तस्करी नियन्त्रणका लागि उच्च सतर्कता अपनाइएको बताए । उनका अनुसार अवैध ओसारपसार नियन्त्रण गर्ने क्रममा चैत महिनामा मात्रै मोरङ प्रहरीले १ करोड ५५ लाख ४५ हजार रुपैयाँ बराबरको सामान बरामद गरी भन्सार बुझाइसकेको छ ।