विराटनगरमा सिटी सफारी चोरी, कबाडी गोदाममा भेटियाे पार्टपूर्जा

विराटनगर । विराटनगरमा पछिल्लो समय सीटी सफारी चोरी हुने क्रम बढ्दै गइरहेका बेला प्रहरी चाेरी गर्ने गिराेहसम्म पुगेकाे छ  ।  विशेष सूचनाका आधारमा मोरङ प्रहरीले विराटनगर–६ सरौचियास्थित विजय सहनीको कबाडी गोदाममा छापा मारी चोरीका सफारीका  पार्टपूर्जा बरामद गरेको हो ।

चोरी गरिएका सफारीलाई सिधै प्रयोग नगरी पहिचान मेटाउन पार्टपूर्जा टुक्र्याएर कबाडीमा बिक्री गर्ने गरेको देखिएकाे प्रहरीले जनाएको छ । गोदाममा प्लास्टिकले छोपेर लुकाइएको अवस्थामा दुईवटा सफारीका पार्टपूर्जा फेला परेकाे मोरङ प्रहरीका डीएसपी लीलाराज लामिछानेले बताए । गोदाम सञ्चालक सहनी भने फरार छन् ।

लामिछानेका अनुसार चोरीका सफारीलाई पार्टपूर्जा बनाएर बेच्ने यो एउटा संगठित गिरोह हो ।

मोरङ प्रहरी प्रमुख एसपी कवित कटवालले घटनाको विस्तृत अनुसन्धान भइरहेको जानकारी दिँदै नागरिकलाई सवारी सुरक्षामा सतर्क रहन आग्रह गरेका छन् ।