सरकारले प्रतिशोधपूर्ण रूपमा थुनामा राखे पनि प्रमाण नपुगेपछि रिहा भएँ : केपी शर्मा ओली

काठमाडौ‌ं । नेकपा (एमाले) का अध्यक्ष केपी शर्मा ओलीले सरकारले आफूलाई पूर्वाग्रह र प्रतिशोधपूर्ण रूपमा फौजदारी अभियोग लगाएर हिरासतमा लिएको आरोप लगाएका छन् । १३ दिनसम्म हिरासतमा रहेर बिहीबार छुटेका उनले सामाजिक सञ्जाल मार्फत  मुद्दा चलाउने आधार र प्रमाण नपुगेपछि मात्र आफू हिरासत मुक्त भएको बताएका हुन् ।

‘सरकारले ममाथि पूर्वाग्रह राख्यो, तर न्यायको अगाडि त्यसले काम गरेन । अन्ततः मुद्दा चलाउने कुनै आधार नभेटिएपछि म रिहा भएको छु ।’ उनले भनेका छन् ।

अध्यक्ष ओलीले आफूलाई हिरासतमा रहँदा सहयोग गर्ने कानुन व्यवसायी, राजनीतिक दलका नेता, सञ्चारकर्मी र न्यायप्रेमी जनताप्रति आभार प्रकट गरेका छन् ।

आफ्नो रिहाइको माग गर्दै भएको प्रदर्शनमा प्रहरी दमनबाट घाइते भएकाहरूको स्वास्थ्यलाभको कामना गर्दै ओलीले उनीहरूको उपचार खर्च राज्यले बेहोर्नुपर्ने माग गरेका छन् । ‘घाइतेहरूको उपचार खर्च राज्यले बेहोर्नुपर्दछ,’ उनले भनेका छन्, ‘यसमा राज्य उदासीन भएमा पार्टीले नै उपचारको सम्पूर्ण खर्च बेहोर्ने जानकारी गराउँछु ।’

सामाजिक सञ्जाल फेसबुकमा ओलीले लेखेकाे स्टाटस

सरकारले पूर्वाग्रह र प्रतिशोधपूर्ण रूपमा फौजदारी अभियोग लगाई १३ दिनसम्म गैरकानुनी नियन्त्रणमा राखे पनि मुद्दा चलाउने आधार र प्रमाण नपुगेपछि अन्ततः म रिहा भएको छु। मेरो रिहाइका लागि आवाज उठाउनुहुने सम्पूर्ण न्यायप्रेमी दिदीबहिनी तथा दाजुभाइहरू, कानुनी लडाइँमा अहोरात्र साथ दिनुहुने कानुन व्यवसायी मित्रहरू, न्यायकर्मीहरु, न्यायको पक्षमा वकालत गर्ने विभिन्न राजनीतिक दल, नेताहरू र सञ्चारकर्मीहरूप्रति आभार प्रकट गर्दछु। साथै, परमादेश जारी गर्ने सम्मानित सर्वोच्च अदालतप्रति उच्च सम्मान व्यक्त गर्दछु। प्रहरी नियन्त्रणमा रहँदा मप्रति मानवीय व्यवहार गर्ने प्रहरी प्रशासन र मेरो स्वास्थ्योपचारमा तल्लीन त्रिवि शिक्षण अस्पताल परिवारप्रति पनि म कृतज्ञ छु। मेरो रिहाइको माग गर्नेहरूमाथि चर्को दमन गरी घाइते बनाएका सबै घाइतेहरुको शीघ्र स्वास्थ्यलाभको कामना गर्दछु । उहाँहरूको उपचार खर्च राज्यले बेहोर्नु पर्दछ, यसमा राज्य उदासीन भए पार्टीले उपचार खर्च बेहोर्ने जानकारी गराउँछु । प्रतिकूल स्वास्थ्य अवस्थाका कारण केही दिन अस्पतालमै रहेर उपचार गराउने जानकारी गराउँदै यस घडीमा सद्भाव र शुभेच्छा प्रकट गर्नुहुने पार्टीका समग्र नेता-कार्यकर्ता एवं समस्त शुभचिन्तकहरूमा हार्दिक आभार व्यक्त गर्दछु।