प्रहरीमा दिएको उजुरी र जाहेरीको प्रगति अब मोबाइलमै पाइने

काठमाडौं । प्रहरी कार्यालयमा उजुरी वा जाहेरी दिएपछि त्यसको प्रगति बुझ्न पटक-पटक कार्यालय धाउनुपर्ने झन्झट अब अन्त्य भएको छ । नेपाल प्रहरीले नागरिकको सेवालाई थप प्रभावकारी, सरल र प्रविधिमैत्री बनाएपछि कार्यालय धाउनुपर्ने बाध्यता अन्त्य भएकाे हाे । अब उजुरीको प्रगति विवरण सम्बन्धित व्यक्तिको मोबाइलमै आइपुग्नेछ ।

नेपाल प्रहरीले सार्वजनिक गरेकाे सूचना अनुसार अब मातहतका विभिन्न निकायमा प्राप्त भएका निवेदन, गुनासा तथा जाहेरीको अनुसन्धान कहाँ पुग्यो र के–कस्तो कारबाही भइरहेको छ भन्ने जानकारी ‘फोन वा एसएमएस’ मार्फत दिइनेछ ।

नागरिक सेवालाई चुस्त बनाउन यो प्रणाली सुरु गरिएको प्रहरीले जनाएकाे छ ।

प्रहरी प्रधान कार्यालयले मुद्दा दर्ता हुने सबै प्रहरी एकाइहरूलाई यस सम्बन्धमा निर्देशन दिइसकेको छ । सूचनामा भनिएको छ, “मुद्दा दर्ता हुने प्रहरी एकाइहरूसम्म सेवाग्राहीबाट प्राप्त हुन आएका उजुरी, निवेदन, गुनासो, जाहेरी दरखास्त आदि दर्ता भएपश्चात् त्यसको प्रगति के भयो र के–कसरी कार्यान्वयन भइरहेको छ भनेर सम्बन्धित सेवाग्राहीहरूले दिनुभएको सम्पर्क नम्बरमा फोन गरेर वा एसएमएसमार्फत सूचना दिने व्यवस्था लागू गरिएको छ।”
यसअघि आफ्नो उजुरीको अवस्था बुझ्न सेवाग्राहीहरू स्वयम् प्रहरी कार्यालय पुग्नुपर्ने बाध्यता थियो । नयाँ व्यवस्था लागू भएसँगै सेवाग्राहीको समय बचत हुने र प्रहरीको कार्यसम्पादनमा समेत पारदर्शिता आउने प्रहरीको विश्वास छ ।