प्रधानन्यायाधीश राउत अनिवार्य अवकाशमा जाँदै

काठमाडौं । सर्वाेच्च अदालतका  प्रधानन्यायाधीश प्रकाशमान सिंह राउत भोलिदेखि अनिवार्य अवकाश हुँदैछन् । कानुन व्यवसायी पृष्ठभूमिबाट सर्वोच्चको न्यायाधीश हुँदै प्रधानन्यायाधीश बनेका राउत ६५ वर्षे उमेर हदका कारण भोलिबाट अवकाशमा जान लागेका हुन् ।

सर्वोच्चका प्रवक्ता अर्जुनप्रसाद कोइरालाले प्रधानन्यायाधीश राउत आज अदालतमा उपस्थित हुने र भोलिबाट अनिवार्य अवकाशमा जाने बताए ।

उनको अवकाशपछि सर्वोच्च अदालतमा वरिष्ठतम् न्यायाधीश सपना प्रधान मल्ल कायममुकायम प्रधानन्यायाधीशका रूपमा रहनेछिन् । मल्ल पनि कानुन व्यवसायी पृष्ठभूमिकी हुन् ।

वकालतमा ३३ वर्ष र सर्वोच्च अदालतको न्यायाधीशका रूपमा ८ वर्ष बिताएका प्रकाशमान सिंह राउत प्रधानन्यायाधीश बनेका थिए । २०७३ साउन १७ गते उनी न्यायाधीशका रूपमा प्रवेश गर्दा नै  प्रधानन्यायाधीशको रोलक्रममा थिए ।