बालेन शाहको सत्तारोहण : शीतल निवासमा स्वस्तिवाचन, बालुवाटारमा पूजाआजा

काठमाडाैं । नेपाली राजनीतिमा एउटा नयाँ अध्यायको सुरुवात गर्दै रास्वपाका वरिष्ठ नेता बालेन शाह मुलुकको कार्यकारी प्रमुखको जिम्मेवारीमा पुगेका छन् । रामनवमीकाे दिन शुक्रबार करिब दुई तिहाइ बहुमतसहित शाहले प्रधानमन्त्रीको रूपमा सिंहदरबारको यात्रा तय गरे ।

शक्तिशाली प्रधानमन्त्रीका रूपमा उदय भएका शाहको कार्यशैली र सत्तारोहणको प्रक्रिया विगतका प्रधानमन्त्रीहरूभन्दा भिन्न देखियो । उनले आफ्नो राजकाजको सुरुवात परम्परागत शैलीमा गरे ।

शुक्रबार मध्यान्ह शुभसाइत पारेर राष्ट्रपति कार्यालय शीतल निवासमा शाहले पद तथा गोपनीयताको शपथ लिएका थिए । शपथ ग्रहण समारोहमा विगतको जस्तो औपचारिक तामझाम मात्र थिएन, त्यहाँ वैदिक विधिअनुसार स्वस्ति वाचन र शंखनाद समेत गरिएको थियो ।

शपथ लगत्तै साइत हेराएर दिउँसो २:१५ बजे प्रधानमन्त्री शाह सिंहदरबारस्थित प्रधानमन्त्री तथा मन्त्रिपरिषद्को कार्यालय पुगेका थिए । पदबहाली लगत्तै उनले पहिलो मन्त्रिपरिषद् बैठक डाके । बैठकमा उनले सुशासन र सेवा प्रवाहसँग सम्बन्धित निर्णय गरे । मन्त्री र सचिवहरूलाई परिणाममुखी काम गर्न कडा निर्देशन दिए ।

सिंहदरबारको कार्यभार सकेपछि प्रधानमन्त्री शाह अपरान्ह सरकारी निवास बालुवाटार प्रवेश गरेका थिए । बालुवाटार प्रवेश गर्नुअघि उनले त्यहाँ विशेष पूजाआजा र धार्मिक अनुष्ठान गरेका थिए । सत्ताको बागडोर सम्हाल्दै गर्दा आफूलाई सांस्कृतिक र धार्मिक मूल्यमान्यताप्रति प्रतिबद्ध देखाउनु शाहको नयाँ राजनीतिक शैलीका रूपमा हेरिएको छ ।

विगतका प्रधानमन्त्रीहरू धार्मिक कृत्यहरूबाट टाढा रहने कोसिस गर्थे । तर, प्रधानमन्त्री बालेन शाहले रामनवमीको दिन पारेर सार्वजनिक रूपमै धार्मिक र सांस्कृतिक पहिचानलाई महत्त्व दिँदै सत्ताको यात्रा सुरु गरेका हुन् ।