बुढीगंगाका अग्निपीडितलाई जीवन विकासको सहयोग

विराटनगर । मोरङको बुढीगंगा गाउँपालिका वडा– ३ ऋषिदेव बस्तीका आगलागीपीडित परिवारहरूलाई जीवन विकास लघुवित्त वित्तीय संस्थाले राहत सामग्री वितरण गरेको छ । चैत ४ गते भएको भीषण आगलागीबाट सर्वश्व गुमाएका अति विपन्न ऋषिदेव समुदायका १२ घरपरविारका ६१ जना सदस्यहरूलाई जीवन विकासले सहयोग गरेको छ ।

आगलागीका कारण बिचल्लीमा परेका परिवारहरूलाई जीवन विकासले सुरुमा खाना पकाएर खुवाएको थियो ।  त्यसपछि १२ घरपरिवारलाई खाना पकाउने र खाने भाँडाकुँडाको सेट वितरण गरेको थियाे । भाँडाकुँडा वितरणपछि जीवन विकासले पीडित परिवारका सदस्यहरुका लागि अतिआवश्यक लत्ताकपडा वितरण गरेको छ ।

विपदको समयमा सामाजिक उत्तरदायित्व अन्तरगत जीवन विकासले पीडित परिवारलाई सहयोग गरेको हाे । जीवन विकासको सहयोगले पीडित परिवारलाई ठूलाे राहत मिलेको स्थानीय बासिन्दाहरूले बताएका छन् ।

घरदैलोमा पुगेर वित्तीय सेवा प्रवाह गरिरहेको जीवन विकासले सामाजिक अभियानलाई पनि प्राथमिकताका साथ अघि बढाएको छ ।