माैसम : आज र भाेलि वर्षाकाे सम्भावना

काठमाडौं । पश्चिमी वायुकाे प्रभावका कारण आज शुक्रबारदेखि देशभर मौसम बदली भई वर्षाको सम्भावना  छ । जल तथा मौसम विज्ञान विभागका अनुसार यसको प्रभाव भोलि शनिबारसम्म कायम रहनेछ ।

आज दिउँसोदेखि नै देशका विभिन्न भागमा बादल लाग्ने र साँझतिर हावाहुरीसहित हल्कादेखि मध्यम खालको वर्षा सुरु हुन सक्ने पूर्वानुमान गरिएको छ । पूर्वी तथा मध्य भागमा यसको प्रभाव बढी देखिने सम्भावना छ भने पश्चिमी क्षेत्रमा तुलनात्मक रूपमा कम प्रभाव पर्नेछ ।

काठमाडौं उपत्यकामा पनि आज साँझतिर मेघगर्जन, चट्याङ र हावाहुरीसहित पानी पर्ने सम्भावना छ । भोलि शनिबार पनि उपत्यकासहित देशका धेरै स्थानमा हल्कादेखि मध्यम वर्षा जारी रहने अनुमान गरिएको छ।

जल तथा मौसम विज्ञान विभाग का वरिष्ठ मौसमविद बरुण पौडेलले काठमाडौं उपत्यकामा पनि शुक्रबार र शनिबार हल्कादेखि मध्यम खालको वर्षाको सम्भावना रहेको जानकारी दिए ।

प्रिमनसुनको समय भएकाले यस अवधिमा हावाहुरी, चट्याङ र असिनाको जोखिम बढी हुने गर्दछ । त्यसैले आवश्यक सतर्कता अपनाउन आग्रह गरिएको छ। विशेषगरी किसान तथा सर्वसाधारणलाई असिना र हुरीबाट हुन सक्ने क्षतिबाट जोगिन सावधानी अपनाउन माैसम विभागले सुझाव दिएको छ ।

आज दिउँसो कोशी, बागमती र गण्डकी प्रदेशका पहाडी तथा हिमाली भागका धेरै स्थानमा तथा बाँकी प्रदेशका पहाडी र हिमाली भागका केही स्थानमा मेघगर्जन, चट्याङ, हुरी तथा असिनासहित मध्यम वर्षा तथा हिमपातको सम्भावना छ । साथै तराईका केही स्थानमा पनि मध्यम वर्षा हुन सक्ने जनाइएको छ ।