पार्टी पराजित भएपछि ओलीले भने,‘जनताको फैसला शिरोधार्य छ’

काठमाडौं । नेकपा (एमाले) का अध्यक्ष केपी शर्मा ओलीले प्रतिनिधिसभा निर्वाचनको परिणाम अपेक्षा गरेजस्तो नआए पनि जनताको मतलाई सम्मान गर्ने बताएका छन् ।

बिहीबार सामाजिक सञ्जालमार्फत मतदाताहरूलाई धन्यवाद दिँदै उनले निर्वाचनमा प्राप्त भएको परिणामलाई लोकतान्त्रिक प्रक्रियाको उपजका रूपमा स्वीकार गरेका हुन् ।

अध्यक्ष ओली आफैँ पनि झापा निर्वाचन क्षेत्र नम्बर ५ बाट पराजित भए । उनलाई राष्ट्रिय स्वतन्त्र पार्टी (रास्वपा) का उम्मेदवार बालेन्द्र शाहले पराजित गरेका हुन् ।

‘यस पटकको निर्वाचनमा मैले अपेक्षा गरेजस्तो परिणाम प्राप्त गर्न सकिनँ, हाम्रो पार्टीले पनि अपेक्षित परिणाम ल्याउन सकेन,’ ओलीले भनेका छन्, ‘लोकतान्त्रिक प्रणालीमा अन्तिम फैसला जनताकै हुन्छ र त्यो फैसला शिरोधार्य गर्नु म र मेरो पार्टीको कर्तव्य हो ।’

ओलीले एमालेको पक्षमा मतदान गर्ने सबैलाई हृदयदेखि धन्यवाद दिँदै जनताको विश्वास नै आफ्नो शक्ति भएको बताएका छन् । ‘निर्वाचनको परिणाम हाम्रो पक्षमा नआए पनि जनताप्रतिको हाम्रो प्रतिबद्धता र सेवाभाव कत्ति पनि कमजोर भएको छैन,’ उनले उल्लेख गरेका छन्, ‘हामी आगामी दिनमा पनि जनताकै बीचमा रहनेछौँ र यो सम्बन्धलाई अझ बलियो बनाउँदै अघि बढ्नेछौँ ।’