समानुपातिक तर्फ काेशीमा दाेस्राे बन्याे श्रम संस्कृति पार्टी

विराटनगर । प्रतिनिधिसभा निर्वाचनमा कोशी प्रदेशबाट श्रम संस्कृति पार्टीको उदय भएको छ । चार महिना अघि गठन भएको श्रम संस्कृति पार्टी पहिलो निर्वाचनमा राष्ट्रीय दल बनेको छ । प्रत्यक्षमा ३ तीन सिट जितेको श्रम संस्कृतिले समानुपातिकमा पनि अब करिब ४ सिट पाउनेछ ।

देशव्यापी रुपमा रास्वपाको लहर चल्दा कोशीमा श्रम संस्कृतिले समानुपातिक मतमा कांग्रेस–एमालेलाई पछि पारेको छ । कोशी प्रदेशको समानुपातिक मतमा रास्वपा पहिलो छ । श्रम संस्कृति दोस्रो दल बनेको छ। कांग्रेस तेस्रो र एमाले चौथो स्थानमा पुगेका छन् ।

कोशी प्रदेशबाट रास्वपा ८ लाख ५३ हजार १ सय ८४ मत ल्याएको छ । दोस्रो दल श्रम संस्कृति पार्टी बनेको छ । श्रम संस्कृतिले २ लाख ९२ हजार ४९ मत पाएको छ । यो पार्टीले देशभरबाट ३ लाख ८५ हजार ६ सय ७९ मत पाएको छ ।

अन्य प्रदेशमा कांग्रेस, एमाले, नेकपा लगायतका दलबाट भोट रास्वपातिर स्विङ भएको देखिन्छ । कोशीमा भने मत श्रम संस्कृतिमा पनि उल्लेख्य मत गएको छ । श्रम संस्कृतिभन्दा पछि परेको कांग्रेसले २ लाख ९० हजार ५६२ मत पाएको छ । एमालेले दुई लाख ८८ हजार १ सय ८६ मत ल्याएको छ । नेकपा जम्मा ९७ हजार ६ सय ७९ मत ल्याएको छ ।

कोशीमा प्रत्यक्षमा श्रम संस्कृतिले ३ तीन सिट जितेको छ । कांग्रेस एमालेले ४–४ सिट जितेको छ । श्रम संस्कृतिले खोटाङ, धरान र भोजपुरमा तीन सिट जितेको हो । कोशी प्रदेशबाट रास्वपाले १७ सिट जितेको थियो ।