६ दलले पाए राष्ट्रिय दलकाे मान्यता, एउटा नयाँ

काठमाडौं । फागुन २१ गतेको निर्वाचनबाट ६ वटा राजनीतिक दलले राष्ट्रिय दलकाे मान्यता पाएका छन् । राष्ट्रिय दलकाे मान्यता पाउनेमा ५ वटा पुराना दल छन् । एउटा नयाँ छ ।

याे निर्वाचनबाट राष्ट्रिय दलको मान्यता पाउने नयाँ दल हर्क साम्पाङ नेतृत्व गरेकाे श्रम संस्कृति पार्टी हाे । चार महिना अघि खुलेकाे यो पार्टीले प्रत्यक्षतर्फ तीन सिट जितेको छ । समानुपातिकतर्फ तीन प्रतिशत थ्रेसहोल्ड कटाएको छ ।

समानुपातिक तर्फ राष्ट्रिय स्वतन्त्र पार्टी (रास्वपा) पहिलाे बनेकाे छ । नेपाली कांग्रेस, नेकपा एमाले, नेपाली कम्युनिस्ट पार्टी र राष्ट्रिय प्रजातन्त्र पार्टी (राप्रपा) पाँचाै‌ बनेकाे छ । यी पाँच दल विघटित प्रतिनिधि सभामा पनि राष्ट्रिय दलको रुपमा थिए ।

समानुपातिक तर्फ एक करोड ७ लाख ६४ हजार ८ सय ८९ मत मध्ये रास्वपाले ५१ लाख ४६ हजार ६ सय ८१ मत ल्याएको छ । यो कुल मतको करिब साढे ४७ प्रतिशत भन्दा बढी हो । रास्वपाले समानुपातिक तर्फ ५७ सिट पाउने सम्भावना छ । रास्वपाले प्रत्यक्ष तर्फ १२५ सिट जितेकाे छ ।

दोस्रो पार्टीको रुपमा रहेको नेपाली कांग्रेसले समानुपातिकमा २० सिट पाउनेछ । कांग्रेसले प्रत्यक्षमा १८ सिट जितेको छ । कांग्रेसले १७ लाख ५४ हजार ५२ मत ल्याएको छ । प्रत्यक्ष र समानुपातिक गरी प्रतिनिधिसभामा कांग्रेसको ३८ सिट हुनेछ ।

एमालेले समानुपातिकबाट १६ सिट पाउने देखिएको छ । प्रत्यक्ष तर्फ ९ सिट जितेको छ । प्रतिनिधि सभामा एमालेकाे २५ सिट हुनेछ । एमालेले समानुपातिक तर्फ १४ लाख ५१ हजार ७५९ मत पाएकाे छ ।

नेपाली कम्युनिस्ट पार्टीले समानुपातिकमा ९ सिट पाउनेछ । नेकपाले प्रत्यक्षमा ८ सिट जितेको छ । प्रतिनिधिसभामा नेकपाको १७ सिट हुनेछ । नेपाल कम्युनिस्ट पार्टीले समानुपातिकतर्फ ८ लाख ८ हजार ५ सय ८२ मत पाएको छ । श्रम संस्कृति र राप्रपाले समानुपातिकमा ४/४ सिट पाउने छन् । श्रम संस्कृतिले ३ सिट प्रत्यक्षमा जितेकाले अब उसको कुल ७ सिट हुनेछ । राप्रपाले प्रत्यक्षमा एक सिट जितेकाले कुल ५ सिट हुनेछ ।