धरानमा पार्किङ गरी राखिएका ६ वटा बसमा आगलागी

धरान । सुनसरीको धरानमा पार्किङ गरेर राखेकाे बसमा आगलागी भएकाे छ । धरान उपमहानगरपालिका–८ स्थित अटल ग्यारेजमा पार्किङ गरी राखिएका ६ वटा यात्रुबाहक बसमा मंगलबार राति आगलागी भएको छ । आगलागीबाट तीनवटा बस पूर्ण रूपमा जलेर नष्ट भएका छन् भने अन्य तीनवटामा आंशिक क्षति पुगेको छ ।

जिल्ला प्रहरी कार्यालय सुनसरीका प्रहरी नायब उपरीक्षक चन्द्र खड्काका अनुसार आगलागीबाट को १ ख ६२७४ नम्बरको कृष्ण बस, प्र १–०१–००१ ख ४०३७ नम्बरको कन्काई यातायात र बा ४ ख ५७५९ नम्बरको पाथिभरा दर्शन बस पूर्ण रूपमा जलेर नष्ट भएका छन् । को १ ख ३८४७ नम्बरको सुपर मादेन, बा ५ ख ५८१४ र बा ५ ख ५८०९ नम्बरका बसमा आंशिक क्षति पुगेको छ ।

प्रहरीको प्रारम्भिक अनुसन्धानले बसको वायरिङमा ‘सर्ट सर्किट’ भएर आगो लागेको देखाएको छ । “सीसीटिभी फुटेज जाँच गर्दा कुनै शंकास्पद गतिविधि देखिएको छैन,” डीएसपी खड्काले भने, “बसकै प्राविधिक गडबडीका कारण आगलागी भएको हुनसक्ने हाम्रो अनुमान छ । थप अनुसन्धान भइरहेको छ ।”

प्रहरीका अनुसार आगलागीको सुरुवात विराटनगर–धरान रुटमा चल्ने को १ ख ६२७४ नम्बरको कृष्ण बसबाट भएको थियो । सोही बसमा एक महिनाअघि पनि गुडिरहेकै अवस्थामा आगलागी भएको  थियाे छ ।  उक्त बस मंगलबार राति करिब ९ बजे पार्किङका लागि ग्यारेजमा छिरेको थियो । त्यसको आधा घण्टापछि अर्थात् साढे ९ बजेबाट आगो देखिएकाे थियाे । प्रहरीलाई करिब १० बजे मात्रै जानकारी प्राप्त भएको थियो । खबर पाउनासाथ पुगेको प्रहरी र दमकलको सहयोगमा आगो नियन्त्रणमा लिएको थियो ।