सबै जिल्लामा पुग्याे मतपत्र

काठमाडौं । फागुन २१ गते हुने प्रतिनिधिसभा सदस्य निर्वाचनका लागि आवश्यक मतपत्र र निर्वाचन सामग्री देशका सबै जिल्लामा पुर्याउने कार्य अन्तिम चरणमा पुगेको छ ।

निर्वाचन आयोगका अनुसार बिहीबारसम्ममा सबै जिल्लामा मतपत्र ढुवानी सम्पन्न हुनेछ । मतपत्र छपाइ सम्पन्न भइसकेको आयोगले जनाएको छ । सुरक्षा व्यवस्थासहित देशभर पठाउने कार्य तीव्र रूपमा अघि बढाइएको छ ।

भौगोलिक अवस्थाअनुसार दुर्गम तथा हिमाली क्षेत्रका ५ जिल्लामा हवाई मार्गबाट र अन्य जिल्लामा स्थलमार्गबाट मतपत्र ढुवानी गरिएको हो । निर्वाचन सुरक्षालाई लक्षित गर्दै नेपाली सेनाले तीन चरणको सुरक्षा रणनीति अवलम्बन गरेको छ ।

राष्ट्रिय सुरक्षा परिषद्को सिफारिसमा मन्त्रिपरिषद्को निर्णय तथा राष्ट्रपतिबाट स्वीकृति प्राप्त भएपछि सेना निर्वाचन सुरक्षाका लागि परिचालन भइसकेको छ । सैनिक प्रवक्ता सहायक रथी राजाराम बस्नेतका अनुसार निर्वाचनपूर्व, मतदानको दिन र मतगणना सम्पन्न भई परिणाम घोषणा नहुन्जेलसम्म सुरक्षा व्यवस्था प्रभावकारी बनाइनेछ ।

सेनाले मतपत्र छपाइस्थलको सुरक्षा, काठमाडौंबाट जिल्ला निर्वाचन कार्यालयसम्म मतपत्र ढुवानी तथा संवेदनशील संरचनाको सुरक्षा जिम्मेवारी सम्हालिरहेको जनाएको छ । निर्वाचनको दिन मतदानस्थलमा तेस्रो घेरामा सुरक्षा प्रदान गर्ने सेनाले मतदान सम्पन्न भएपछि मतपेटिका सुरक्षित रूपमा मतगणनास्थलसम्म पुर्याउने छ ।

निर्वाचन आयोगले देशभर २३ हजार १ सय १२ नियमित मतदान केन्द्र निर्धारण गरिसकेको छ । ती मतदान केन्द्रमा आवश्यक जनशक्ति, सामग्री र मतपत्र पठाउने क्रम अन्तिम चरणमा पुगेको आयोगले जनाएको छ । साथै, आयोगले देशभर १ सय ४३ अस्थायी मतदान केन्द्र पनि निर्धारण गरेको छ ।

निर्वाचनमा खटिएका कर्मचारी, सेना, प्रहरीलगायतका लागि अस्थायी मतदान केन्द्र तोकिएको आयोगका सहायक प्रवक्ता सीता श्रीष पुनले जानकारी दिइन् । उनका अनुसार निर्वाचनमा खटिएका वा निर्धारित मतदानस्थलमा पुग्न नसक्ने मतदातालाई अस्थायी मतदाताको रूपमा सूचीकृत गरिएको छ । आयोगका अनुसार यसपटक १ लाख ८६ हजार अस्थायी मतदाता कायम भएका छन् ।

अस्थायी मतदाताले समानुपातिक निर्वाचन प्रणालीतर्फ तोकिएको मतदानस्थलमा मात्र मतदान गर्न पाउने व्यवस्था गरिएको छ । नेपाल सरकार, प्रदेश सरकार, स्थानीय तह तथा सरकारी स्वामित्वका संस्थामा कार्यरत कर्मचारी, सेना, प्रहरी, कारागारका थुनुवा तथा कैदी, निर्वाचनमा खटिएका कर्मचारी तथा सुरक्षाकर्मी र संवैधानिक निकायका पदाधिकारीहरू अस्थायी मतदाता सूचीमा समावेश गरिएको छ ।

राज्यको संरक्षणमा रहेका ज्येष्ठ नागरिकसमेत अस्थायी मतदाताका रूपमा सहभागी हुन पाउने व्यवस्था गरिएको छ । निर्वाचन सुरक्षासम्बन्धी गतिविधिको केन्द्रीय तथा स्थानीय तहबाट निरन्तर अनुगमन भइरहेको छ ।

प्रधानसेनापतिले विभिन्न कमान्ड सेन्टर तथा फिल्डमा खटिएका फौजको निरीक्षण गर्दै आवश्यक निर्देशन दिइरहेको सेनाले जनाएको छ । निर्वाचनलाई स्वच्छ, निष्पक्ष र सुरक्षित रूपमा सम्पन्न गर्न आयोग र सुरक्षा निकायले संयुक्त रूपमा तयारी अघि बढाएका छन् ।