मोरङ-४ मा गुरुराज घिमिरेको ३९ बुँदे प्रतिवद्धता पत्र सार्वजनिक

विराटनगर । आसन्न  प्रतिनिधिसभा निर्वाचनको सरगर्मी बढिरहेका बेला मोरङ क्षेत्र नम्बर ४ बाट प्रतिनिधिसभा सदस्यका उम्मेदवार एवं नेपाली कांग्रेस महामन्त्री  गुरुराज घिमिरेले आफ्नो चुनावी एजेण्डा सार्वजनिक गरेका छन् । सोमबार साँझ विराटनगरमा आयोजित पत्रकार सम्मेलनमार्फत घिमिरेले क्षेत्र नम्बर ४को विकासका लागि ३९ बुँदे प्रतिबद्धता पत्र सार्वजनिक गरेका हुन् ।

घिमिरेले शिक्षा, स्वास्थ्य, कृषि, खेलकुद र भौतिक पूर्वाधारलाई उच्च प्राथमिकतामा राख्दै आफ्नो कार्ययोजना प्रस्तुत गरेका छन् । २०७२ को संविधान निर्माण प्रक्रियामा नेतृत्वदायी भूमिका खेलेका घिमिरेले यसपटक विकास र नीतिगत सुधारको एजेण्डा लिएर मतदाताको घरदैलोमा पुगेको बताए ।

खेलकुद ग्राम र अन्तर्राष्ट्रिय क्रिकेट मैदान

घिमिरेको प्रतिबद्धता पत्रको मुख्य आकर्षण विराटनगर–१९ मा निर्माणाधीन ‘गिरिजाप्रसाद कोइराला अन्तर्राष्ट्रिय क्रिकेट मैदान’ रहेको छ । मैदानलाई केन्द्रमा राखेर सो क्षेत्रलाई ‘खेलकुद ग्राम’का रूपमा विकास गर्ने उनले घोषणा गरेका छन् । अन्तर्राष्ट्रिय स्तरका प्रतियोगिता सञ्चालन गर्न सक्ने पूर्वाधार, आधुनिक प्रशिक्षण केन्द्र र बहुउद्देश्यीय खेल मैदान निर्माण गरी मोरङ–४ लाई देशकै खेलकुद हब बनाउने उनको लक्ष्य छ ।

शिक्षा क्षेत्रमा घिमिरेले आफ्नो क्षेत्रभित्र पर्ने विराटनगर महानगरपालिकाका विभिन्न वडा, कटहरी, ग्रामथान र बेलबारीका सामुदायिक विद्यालयमा अंग्रेजी माध्यमबाट पठनपाठन सुरु गर्ने प्रतिबद्धता जनाएका छन् । आमाबुबाकाे नाममा छात्रवृद्धि दिने याेजना पनि अघि सारेका छन् ।

कृषि प्रधान यस क्षेत्रका किसानका लागि सिँचाइ र बजार पहुँचलाई उनले विशेष महत्त्व दिएका छन् । मोरङ–सुनसरी सिँचाइ आयोजनाको मूल नहर अन्तर्गत खनारदेखि केरौनसम्मका विभिन्न स्थानमा पक्की पुल निर्माण गर्ने योजना उनले अघि सारेका छन् । यसले कृषि उपजलाई बजारसम्म पुर्‍याउन सहज हुनेछ । साथै, सिँचाइ सुविधा नपुगेका स्थानमा डिप बोरिङ र वैकल्पिक सिँचाइको प्रबन्ध गर्ने तथा समयमै मल र बीउ उपलब्ध गराउन पहल गर्ने प्रतिबद्धता उनले व्यक्त गरेका छन् ।  भौतिक पूर्वाधारतर्फ कटहरीको लोहन्द्रा खोलामा पक्की पुल र तटबन्ध निर्माणलाई प्राथमिकतामा राखिएको छ । यसका साथै भूमिहीनहरूको व्यवस्थित बसोबासका लागि ठोस पहल गर्ने उनले बताएका छन् ।

स्वास्थ्य सेवामा सुधार

स्वास्थ्य क्षेत्रतर्फ बेलबारी–७ बाहुनीस्थित प्राथमिक स्वास्थ्य केन्द्रलाई थप व्यवस्थित बनाउँदै प्रयोगशाला र विशेषज्ञ चिकित्सकको सेवा सुनिश्चित गर्ने उनले बताए । सामान्य उपचारका लागि पनि विराटनगर वा अन्यत्र धाउनुपर्ने बाध्यता अन्त्य गर्ने उनको दाबी छ ।

१ लाख १९ हजार २ सय ५५ मतदाता रहेको मोरङ क्षेत्र नम्बर ४ मा घिमिरेले आफ्नो प्रतिबद्धता पत्र केवल चुनावी नारा मात्र नभई कार्यान्वयनयोग्य ‘एक्सन प्लान’ भएको बताए । “म स्पष्ट कार्यदिशा र दीर्घकालीन सोचका साथ आएको छु,” घिमिरेले भने, “यो क्षेत्रलाई शिक्षा, कृषि र खेलकुदको नमुना मोडेल बनाउने मेरो संकल्प हो ।”