स्थिर सरकारका लागि चुनाव अघि राष्ट्रिय सहमति गर्न कांग्रेस उपसभापतिकाे प्रस्ताव

विराटनगर । नेपाली कांग्रेसका उपसभापति विश्वप्रकाश शर्माले चुनावअघि नै पाँच वर्ष स्थिर सरकारका लागि राष्ट्रीय सहमति गर्नु पर्ने बताएका छन् । धरानको भानु चोकमा बिहीबार आयोजित सुनसरी क्षेत्र नम्बर– १ का उम्मेदवार सुजेन्द्र तामाङको चुनावी ‘प्रतिबद्धता घोषणासभा’मा उनले यस्तो प्रस्ताव गरेका हुन् ।

कांग्रेस बहुमत ल्याउने लक्ष्य रहेको बताउँदै उनले ५ वर्ष स्थिर रहने सरकारका लागि चुनाव अघि नै राष्ट्रिय सहमति गरौं भन्ने आफ्नो व्यक्तिगत प्रस्ताव र आह्वान रहेको बताए ।

‘प्रधानमन्त्री ५ वर्ष टिक्न–टिकाउन नयाँ सोच सहितको संवैधानिक प्रावधान राख्न जरुरी छ । यो किन भने बितेको ७५ वर्षमा कुनै पनि प्रधानमन्त्री लगातार ५ वर्ष टिक्न सकेनन्,’ उनले भने ।

प्रत्यक्षको सिट र लोकप्रिय मतको आधारमा पहिलो हुने दलको प्रधानमन्त्रीले पूरै ५ वर्ष शासन गर्ने, बहुमत नपुगेमा ‘विनर्स टेक अल’को नीति बमोजिम अपुग संख्या सुनिश्चित गर्ने, दोस्रो–तेस्रो लगायतका दल सरकारमा नगएर पूरै ५ वर्ष प्रतिपक्षी कित्तामा बस्ने अवधारणामा चुनाव पूर्व जरुरी राष्ट्रिय सहमति गर्नुपर्ने उनको प्रस्ताव छ ।

सभामुख चयनपछि बस्ने संसद्‍को पहिलो बैठकबाट त्यो सहमतिलाई संविधानमा अंकित गर्नु पर्ने उनको प्रस्ताव छ । ‘चुनाव पूर्व सरकार, दलहरू, बौद्धिक क्षेत्र र जेनजी सहितको वृहत् सम्मेलन गरौं । त्यसबाट वर्तमान संविधान र समग्र पद्धतिमा दर्जन बढी सुधारको बुँदागत सहमति गरौं । सार्वजनिक रूपले हाम्रो प्रस्ताव छ ।’ उनले भने ।