इटहरीमा सवारी दुर्घटना हुँदा दुई जनाकाे मृत्यु

विराटनगर । सुनसरीको इटहरी उपमहानगरपालिकाका दुई छुट्टाछुट्टै स्थानमा भएको सवारी दुर्घटनामा परी दुई जनाको मृत्यु भएको छ । मंगलबार साँझ भएका दुर्घटनामा एक मोटरसाइकल चालक र एक साइकल यात्रीले ज्यान गुमाएका हुन् ।

मंगलबार बेलुका करिब ५ बजे इटहरी–१३, ट्रान्सपोर्ट नजिकै कोशी लोकमार्गमा विराटनगरबाट इटहरीतर्फ जाँदै गरेको म.प्र. ०३-००२ ख १८१७ नम्बरको ट्रकले विपरीत दिशाबाट जाँदै गरेको प्र १-०२-०४३ प ७००० नम्बरको मोटरसाइकललाई ठक्कर दिएको थियो । दुर्घटनामा गम्भीर घाइते भएका अन्दाजी ३०–३२ वर्षका पुरुषको उपचारका क्रममा साँझ ५:३२ बजे विराट मेडिकल कलेज बुढीगंगामा मृत्यु भएको प्रहरीले जनाएको छ ।

प्रहरीका अनुसार ट्रक चालकको लापरबाहीका कारण दुर्घटना भएको हो । ट्रक र चालक मकवानपुर मनहरी–१ बस्ने २४ वर्षीय सरोज लामालाई इलाका प्रहरी कार्यालय इटहरीले नियन्त्रणमा लिएको छ ।

इटहरी–६ स्थित पूर्व–पश्चिम राजमार्गको गोल चोकमा बेलुका ५:५० बजेतिर पश्चिमबाट मोडिएर धरानतर्फ जाँदै गरेको प्र १-०२-००२ ख ०५९२ नम्बरको ट्रकले एक साइकल यात्रीलाई ठक्कर दिएको थियो ।

दुर्घटनामा गम्भीर घाइते भएका मोरङ सुन्दरहरैँचा–५ का ४० वर्षीय कुमार श्रेष्ठको धरानस्थित बि.पि. कोइराला स्वास्थ्य विज्ञान प्रतिष्ठानमा उपचारका क्रममा मृत्यु भएको हाे । ठक्कर दिने ट्रक र चालक तेह्रथुम लालीगुराँस–७ का २७ वर्षीय दिल बहादुर मगरलाई प्रहरी चौकी तरहराले नियन्त्रणमा लिएको छ ।