माेरङ ५ का एमाले उम्मेदवारले सार्वजनिक गरे प्रतिबद्धता पत्र

विराटनगर । प्रतिनिधिसभा निर्वाचनका लागि मोरङ क्षेत्र नम्बर ५ का नेकपा (एमाले) उम्मेदवार मनोजकुमार अग्रवालले चुनावी प्रतिबद्धता पत्र सार्वजनिक गरेका छन् । अग्रवालले साेमबार क्षेत्रको समग्र विकास, शिक्षा, स्वास्थ्य, कृषि, उद्यम, संस्कृति र सामाजिक सुरक्षाका सवालमा काम गर्ने जनाउँदै प्रतिबद्धता पत्र सार्वजनिक गरेका हुन् ।

अग्रवालले रंगेली–विराटनगर हुलाकी मार्गको स्तरोन्नति र आधुनिक मार्गमा विकास, दक्षिणी सीमा क्षेत्रमा नयाँ पर्यटन मार्गको निर्माण, क्षेत्रभित्रका सम्पूर्ण सडक, नाला र बिजुली, खानेपानी तथा टेलिफोन जडान कार्य आगामी ५ वर्षभित्र सम्पन्न गर्ने जनाएका छन् । सामुदायिक विद्यालयको स्तरोन्नति,पढ्दै कमाउँदैलगायत कार्यक्रम अघि बढाउने जनाएका छन् ।

उद्योग क्षेत्र पुनःसक्रियकरण, कृषि तथा स्वरोजगारका तालिम सञ्चालन, कृषि उत्पादनको सहज बिक्री वितरण, नवउद्योग स्थापना र युवालाई रोजगारी तथा आत्मनिर्भर बनाउने योजना उनी सार्वजनिक गरेका छन् ।