झापा- ५ : बालेन र ओली घरदैलाेमा

झापा । प्रतिनिधिसभा निर्वाचनका लागि झापा क्षेत्र नम्बर ५ मा नेकपा एमालेका अध्यक्ष केपी शर्मा ओली र रास्वपाका वरिष्ठ नेता बालेन शाह घरदैलाेमा केन्द्रित भएका छन् । अध्यक्ष ओली र नेता शाह आइतबार दमक पुगेका थिए ।

साेमबार बिहानैदेखि दुवै नेता घरदैलो गरेका हुन् । ओली आज दिनभर झापाको दमक नगरपालिकाका विभिन्न मुख्य चोकहरूमा आयोजना हुने भेटघाट कार्यक्रममा व्यस्त छन् । निर्वाचन परिचालन समितिका संयोजक देवेन्द्र दाहालका अनुसार निर्वाचन क्षेत्र नम्बर ५ का उम्मेदवार समेत रहेका ओलीले आज दमकका स्थानीय बासिन्दासँग प्रत्यक्ष संवाद र भेटघाट गर्ने कार्यक्रम तय भएको छ ।

नेता शाह पनि अहिले आफ्नो निर्वाचन क्षेत्रका मतदाताहरूसँग भेट्दै घरदैलोमा छन् । बालेन आफ्नो निर्वाचन क्षेत्रसँग देश दौडाहामा पनि व्यस्त छन् । एमालेले भावी प्रधानमन्त्रीको रूपमा अघि सारेको ओली र रास्वपाले अघि सारेका शाह सँगै चुनावी मैदानमा उत्रिएपछि झापा ५ को चुनावी भिडन्त रोचक बनेकाे छ । क्षेत्र नम्बर ५ मा अन्य दलका उम्मेदवारले पनि चुनावी अभियान तिब्र बनाएका छन् ।