कांग्रेस कोशी प्रदेशका प्रवक्ता विष्टले दिए राजीनामा

विराटनगर । नेपाली कांग्रेस कोशी प्रदेशका प्रवक्ता यदु विष्टले जिम्मेवारीबाट राजीनामा दिएका छन् । विशेष महाधिवेशन पक्षधर रहेका उनले प्रदेश सभापति उद्धव थापासँग वैचारिक मतभेद भएकाे भन्दै राजीनामा दिएका हुन् ।

थापा संस्थापन पक्षधर हुन् । उनले बुधबार प्रदेश सभापतिलाई सम्बोधन गर्दै प्रवक्ताकाे  जिम्मेवारीबाट अलग भएको घोषणा गरे । २०८१ असोज ११ गते उनले प्रवक्तामा नियुक्ती पाएका थिए ।

राजीनामा पत्रमा विष्टले देशको बदलिँदो राजनीतिक परिवेश र विशेषगरी २०८२ भदौ २३ र २४ गते भएको ‘जेनजी आन्दोलन’ पछिको परिस्थितिलाई विशेष महत्त्वका साथ उल्लेख गरेका छन् । गत पुस २७ देखि ३० गतेसम्म काठमाडौँमा सम्पन्न विशेष महाधिवेशनले पार्टीको नीति र नेतृत्वमा आधारभूत परिवर्तन ल्याएको र सोही बदलिएको परिस्थितिमा वर्तमान कार्यसमितिमा रहिरहन असहज भएको उनको जिकिर छ ।

विष्टले राजीनामा पत्रमा लेखेका छन्, “बदलिएको राजनीतिक परिप्रेक्ष्यमा सभापतिज्यूसँग वैचारिक रूपमा मत फरक हुन गएको हुँदा प्रवक्ताको रूपमा काम गर्न असहज परिस्थिति सिर्जना भएको छ । नैतिकताको आधारमा उक्त पदमा बसिरहन उपयुक्त नभएकाले आजकै मितिबाट प्रवक्ता पदबाट राजीनामा गरेको छु ।”