समानुपातिक बन्दसूचीमा महिला उम्मेदवार धेरै

काठमाडौं । फागुन २१ गते हुने प्रतिनिधिसभा निर्वाचनअन्तर्गत समानुपातिक निर्वाचन प्रणालीतर्फ दलहरूले पेस गरेको अन्तिम बन्दसूचीमा पुरुषको तुलनामा महिला उम्मेदवारको संख्या बढी देखिएको छ ।

निर्वाचन आयोगले मंगलबार सार्वजनिक गरेको विवरणअनुसार समानुपातिकतर्फ कूल १ हजार ७ सय ७२ जना महिला उम्मेदवार छन् । पुरुष उम्मेदवारको संख्या १ हजार ३ सय ६३ रहेको छ ।

आयोगका अनुसार समानुपातिक प्रणालीमा ६३ वटा राजनीतिक दल सहभागी भएका छन् । कूल ५७ वटा निर्वाचन चिन्ह कायम गरिएको छ । अन्तिम बन्दसूचीअनुसार समानुपातिकतर्फ कूल ३ हजार १ सय ३५ जना उम्मेदवार कायम भएका छन् ।

प्रतिनिधिसभा सदस्य निर्वाचन ऐन, २०७४ र नियमावलीअनुसार प्रक्रिया पूरा गरी अन्तिम नामावली सार्वजनिक गरिएको आयोगले जनाएको छ । त्यस क्रममा विभिन्न कारण देखाउँदै ७६ जना उम्मेदवारको नाम बन्दसूचीबाट हटाइएको छ ।

हटाइएकामध्ये २१ जना कर्जा सूचना केन्द्रको कालोसूचीमा परेका, २५ जना प्रदेशसभा समानुपातिक सूचीमा दोहोरो नाम परेका, १० जना तोकिएको जरिबाना नतिरेका, १ जना मतदाता नामावलीमा सम्बन्धित क्षेत्रसँग नमिलेका र राजनीतिक दलकै आग्रहमा १० जनाको नाम हटाइएको आयोगले स्पष्ट पारेको छ ।

यसपटक समानुपातिक बन्दसूचीमा महिलाको संख्या उल्लेख्य रूपमा बढी देखिनु समावेशी प्रतिनिधित्वका दृष्टिले महत्वपूर्ण मानिएको छ ।