मोरङ- ४ : ह्याट्रिक गरेका माेदीलाई तीन दलको चुनाैती

विराटनगर । मोरङकाे प्रतिनिधिसभा निर्वाचन क्षेत्र नम्बर ४ मा विगतका दुई निर्वाचनमा जसले सहकार्य गरे,तिनै नेताहरू फागुन २१ को प्रतिनिधिसभा निर्वाचनमा आमने–सामने भएका छन् । जसको केन्द्रमा छन्  पूर्वमन्त्री तथा नेपाली कम्युनिष्ट पार्टीका नेता अमनलाल मोदी ।

२८ वर्षकै उमेरमा २०७० सालमा संविधानसभा सदस्य बनेका मोदीले त्यसपछिका दुईवटै प्रत्यक्ष निर्वाचन जितेर संसदीय यात्रामा  ह्याट्रिक गरिसकेका छन् ।  चौथो पटक संसद छिर्ने उनको यात्रा यसपटक ‘अग्निपरीक्षा’ जस्तै बनेको छ ।

मोदीको जितको इतिहासमा कहिले एमालेले त कहिले कांग्रेसले साथ दिएका थियो । २०७४ को निर्वाचनमा उनले वाम गठबन्धनका तर्फबाट चुनाव जित्दा नेकपा एमालेबाट जीवन घिमिरेले सघाए । उनी क्षेत्र नम्बर ४(ख)बाट विजयी भएर प्रदेशको मन्त्रीसमेत बने ।

२०७९ को निर्वाचनमा समीकरण फेरियो  । तत्कालिन माओवादी केन्द्रले कांग्रेससँग तालमेल गर्दा कांग्रेस नेता गुरुराज घिमिरेले मोदीलाई सघाए । मोदी प्रतिनिधिसभाको उम्मेदवार बन्दा उनी प्रदेशसभाको उम्मेदवार बनेका थिए । मोदी जितेर संसद पुग्दा गुरुराज घिमिरे प्रदेश सभा (४ क) मा पराजित भए ।

अहिले परिस्थिति फेरिएको छ । न त एमालेसँग तालमेल छ, न कांग्रेससँग । मोदी एक्लै मैदानमा छन् र उनको मुख्यप्रतिस्पर्धा पुराना ‘सारथी’ जीवन घिमिरे (एमाले)र गुरुराज घिमिरे (कांग्रेस) छ । जीवन र गुरुराज दुवै गतनिर्वाचनमा प्रदेशसभामा पराजित भएका थिए । प्रदेशसभा र पार्टीकाे  प्रदेश अधिवेशनमा सभापतिमा पराजित भएका घिमिरे राजनीतिक रुपमा अाेझेल परेका थिए । तर, जेनजी आन्दाेलनपछि कांग्रेसकाे विशेष महाधिवेशनबाट महामन्त्री बनेका उनी पुन पार्टी राजनीतिकाे केन्द्रमा छन् । याे क्षेत्रमा नयाँ शक्तिकाे रुपमा उदाएकाे  राष्ट्रिय स्वतन्त्र पार्टीबाट पूर्वपत्रकार सन्तोष राजवंशीको उम्मेदवारीले प्रतिस्पर्धा पेचिलो बनेको छ ।

मोदी र घिमिरेद्वय विद्यार्थी राजनीतिबाट पार्टीको मूलधारको राजनीतिमा आएका नेता हुन् । २०५६ सालदेखि माओवादीमा लागेका मोदी २०६० सालमा पक्राउ परे । दुई बर्ष तीन महिना जेलमा विताए । राजनीतिक आन्दोलनका क्रममा घिमिरे द्वयले पनि पटकपटक हिरासमतमा बसेका छन् ।

१ लाख १९ हजार २५५ मतदाता रहेको यो क्षेत्र थारु बाहुल्य क्षेत्र हो । ग्रामथान र कटहरी गाउँपालिको सबै वडासहित विराटनगरको १, २, ३, ८, १०, १९ बेलबारीको ५, ६ र ७ गरी जम्मा २३ वटा वडाहरू याे क्षेत्रमा छन् । पुरुष मतदाता ६१ हजार १९२ र महिला मतदाताको संख्या ५८ हजार ६२ छन् । १ जना अन्य मतदाता रहेका छन् । मतदानका लागि यस क्षेत्रमा ४० वटा मतदान स्थल र १३१ वटा मतदान केन्द्र तोकिएका छन् ।

२०७९ सालको स्थानीय तह निर्वाचनमा नेकपा एमाले बलियो छ । यो क्षेत्रको २३ वडाहरूमध्ये एमालेले १८ वटा वडा जितेको छ । नेपाली कांग्रेसले ३ वडा र माओवादी केन्द्रले मात्र १ वडा जितेको थियो  २०७९ मंसिर ४ मा भएको प्रतिनिधिसभा निर्वाचनमा अमनलाल मोदीले ३० हजार ६१२ सहित विजयी हुँदा एमाले उम्मेदवार विनोद  ढकालले २४ हजार ४६३ मत प्राप्त गरेका थिए । गत मंसिरमा भएको उपनिर्वाचनमा ग्रामथान गाउँपालिका अध्यक्षमा माओवादी केन्द्रका उम्मेदवार नमोनारायण माझी निर्वाचित भएका थिए ।