सुनसरी–३ मा गच्छदार र चौधरीको ‘चौथो प्रतिस्पर्धा’

विराटनगर । सुनसरी क्षेत्र नम्बर ३ को चुनावी मैदान फेरि एकपटक तातिएको छ । यो एउटा क्षेत्रकाे प्रतिस्पर्धा मात्रै हाेइन, तीन दशकदेखि एकछत्र राज गरिरहेका ‘राजनीतिका चतुर खेलाडी’ विजयकुमार गच्छदार र उनलाई टक्कर दिँदै आएकी नेकपा एमालेकी भगवती चौधरीबीच ‘इगो’ र ‘अस्तित्व’को लडाइँ पनि हो । गच्छदारका लागि याे निर्वाचन जीवनकै कठिन ‘अग्निपरीक्षा’ जस्तै छ ।

यो निर्वाचनमा गच्छदारको उम्मेदवारी आफैँमा एउटा ठूलो राजनीतिक ‘ड्रामा’ हाे । किनकी नेपाली कांग्रेसको संस्थापनकाे नेतृत्वले दुहबीका मेयर बेद गच्छदारलाई टिकट दिइसकेको थियो । तर, अन्तिम समयमा विजय गच्छदारले शेखर काेइराला मार्फत बीचबाटोमै टिकट खोस्न सफल भए । र पटक चुनावी मैदानमा उत्रिएका छन् । उनले बेद गच्छदारलाइ पनि फकाएमा छन् ।

२०४८ सालदेखि २०७४ सम्मका ६ वटा निर्वाचनमा अपराजित रहेका गच्छदारको अपराजित यात्रा २०७९ मा रोकिएको थियो । ५० वर्ष लामो राजनीतिक यात्रामा ललिता निवास जस्ता भ्रष्टाचार मुद्दाले उनलाई गत निर्वाचनमा गाह्रो बनायो । भगवती चौधरीसँगको पछिल्ला तीनवटा भिडन्त निकै रोचक र झिनो मतान्तरका छन् ।

-२०७० को दोस्रो संविधानसभा: गच्छदारले मात्र ३६२ मतले जिते ।
-२०७४ को निर्वाचन: गच्छदार ३२१ मतको झिनो अन्तरले विजयी भए (जसमा भगवतीले धाँधलीको आरोप लगाउँदै अदालतसम्म पुगेकी थिइन्) ।
-२०७९ को निर्वाचन: अन्ततः पासा पल्टियो । भगवती चौधरीले ४०,७८८ मत ल्याएर विजयी हुँदा गच्छदार ३५,६०० मतमा खुम्चिए ।

यसपटक गच्छदार र चौधरीको पुराना प्रतिद्वन्द्वितामा राष्ट्रिय स्वतन्त्र पार्टी (रास्वपा) का अशोक चौधरीले चुनाैती दिइरहेका छन् । नयाँ पुस्ताको मत र पुराना दलप्रतिको वितृष्णालाई क्यास गर्दै अशोकले दुवै पुराना खेलाडीलाई चुनौती दिइरहेका छन् । मैदानमा उनीहरूसहित २३ जना उम्मेदवार छन्, जसमा माओवादीका आशुतोष ढुङ्गेल र जसपाका बद्रीप्रसाद यादव पनि छन्।

गत स्थानीय तहको निर्वाचनको वडागत मत हेर्ने हो भने यहाँ कांग्रेस र एमालेबीच प्रतिस्पर्धा छ। वडाध्यक्षहरूको मत: कांग्रेसले २४,७३१ पाउँदा एमालेले २४,३५४ मत ल्याएको थियो । समानुपातिक तर्फ (२०७९): एमाले (३३,९०२) कांग्रेस (२९,६८०) भन्दा अगाडि देखिन्छ । रास्वपाले ६,८३६ मत ल्याएर आफूलाई तेस्रो शक्तिको रूपमा उभ्याएको छ ।

इटहरीका केही वडादेखि दुहबी, गढी र बर्जुसम्म फैलिएको यो क्षेत्रमा १ लाख ३४ हजार ३०२ मतदाता छन् । ६ पटक चुनाव जितेर रेकर्ड बनाएका गच्छदार यसलाई आफ्नो ‘अन्तिम चुनावी प्रतिस्पर्धा’ भन्दै सहानुभूति बटुल्ने दाउमा छन् भने भगवती चौधरी आफ्नो प्रभाव जोगाउँदै गच्छदारको राजनीतिक विदाई गर्ने दाउमा छिन् ।