वीरेन्द्र सभागृहमा प्रदेशको हिउँदे अधिवेशन, दैनिक भाडा साढे २६ हजार

विराटनगर । कोशी प्रदेशसभाको हिउँदे अधिवेशन माघ २५ गतेका लागि आह्वान भएको छ । बिहीबार बसेको मन्त्रिपरिषद् बैठकको सिफारिसका आधारमा प्रदेश प्रमुख पर्शुराम खापुङले विराटनगरको वीरेन्द्र सभागृहमा हिउँदे अधिवेशन आह्वान गरेका हुन् ।

गत भदौ २४ गते जेनजी आन्दोलनका क्रममा प्रदेशसभा भवन र सचिवालयसहित सरकारी संरचनामा जलेकाे थियाे । वीरेन्द्र सभागृहलाई जेनजी युवाहरुले नै आगजनी हुनबाट जोगाएका थिए । अराजक समूहले आगजनी गर्दा प्रदेशसभा भवन र सचिवालय प्रयोग गर्न नमिल्ने भएपछि प्रदेशसभा भवन र सचिवालय विराटनगरको ‘गुद्री बजार’ सार्नका लागि निर्माण भएकाे कटहरी फलफूल तथा कृषि थोक बजारमा सारिएको थियो । तर,कटहरीको संरचनामा सभा सञ्चालनका लागि आवश्यक पूर्वाधार तयार नभएका कारण विकल्पको रूपमा वीरेन्द्रसभा गृह रोजिएको हो ।

प्रदेशसभा सचिव सुदर्शन खड्काका अनुसार प्रदेशसभाको आफ्नै बैठक कक्ष निर्माणका लागि अहिले ठेक्का प्रक्रिया अगाडि बढेको छ । नयाँ संरचना तयार नहुन्जेलसम्मका लागि अस्थायी रूपमा वीरेन्द्रसभा गृह प्रयोग गरिने उनले बताए । उनका अनुसार बैठक सञ्चालनका लागि प्रदेशसभाले विराटनगर महानगरपालिकालाई मासिक ८ लाख रुपैयाँ शुल्क बुझाउनेछ ।

६ महिनाका लागि गृह भाडामा लिँदा प्रदेश सरकारले कूल ४८ लाख रुपैयाँ महानगरलाई तिर्नुपर्नेछ। यो रकम दैनिक हिसाब गर्दा २६ हजार ६ सय ६७ रुपैयाँ हुन आउँछ । महानगरपालिकासँग सम्झौताका लागि प्रक्रिया अगाडि बढेको बताउँदै खड्काले प्रदेशसभाकाे संरचना तयार भएपछि आफ्नै भवनमा सर्नेछ ।