पूर्वमा ´चुनावी घण्टी` बजाएर काठमाडौं फर्किए बालेन

विराटनगर । राष्ट्रिय स्वतन्त्र पार्टी (रास्वपा) का वरिष्ठ नेता बालेन शाह पूर्वी नेपालका विभिन्न जिल्लामा चुनावी अभियान र धार्मिक यात्रा पूरा गरी शनिबार साँझ काठमाडौं फर्किएका छन् । काठमाडौं महानगरपालिकाको प्रमुख पदबाट राजीनामा दिएर रास्वपामा प्रवेश गरेका शाह नेकपा एमालेका अध्यक्ष केपी शर्मा ओलीसँग चुनावी प्रतिस्पर्धा गर्न झापा क्षेत्र नम्बर ५ मा उम्मेदवारी दर्ता गरी केही पूर्वको भ्रमणमा थिए ।

प्रतिनिधिसभा सदस्यको उम्मेदवारी दर्ताका लागि गत मंगलबार झापाको दमक आइपुगेका शाहले आफ्नो साताव्यापी भ्रमणलाई चुनावी रणनीतिका रूपमा प्रयोग गरे । उनी व्यवसायी कमलकिशोर मालपानीको ८ करोड मूल्य बराबरको ल्यान्ड रोभर डिफेन्डर गाडी चढेर झापा, इलाम, पाँचथर हुँदै ताप्लेजुङको फुङलिङ पुगेका थिए ।

विर्तामोड र दमकमा कार्यकर्तासँगको छलफलपछि उनी बिहीबार इलाम पुगेर रास्वपा उम्मेदवारको पक्षमा घरदैलोमा सहभागी भए । पाँचथरमा समर्थकहरूसँग भेटघाट गर्दै ताप्लेजुङ पुगेका उनले शुक्रबार बिहान प्रसिद्ध तीर्थस्थल पाथिभरा देवीको दर्शन समेत गरे ।

‘अनुमान होइन, अनुभूति चाहिन्छ’

पाथिभराकाे दर्शनपछि तेह्रथुमको म्याङलुङ पुगेका शाहले स्थानीय मतदातासँग अन्तरक्रिया गरे । रास्वपाका उम्मेदवार सुरेन्द्र कार्कीको पक्षमा मत माग्दै उनले राजनीतिमा भूगोल र जनजीवनको प्रत्यक्ष अनुभवको महत्त्वबारे चर्चा गरे । उनले भने, “तेह्रथुमको नाम कागज र विकिपिडियामा मात्र पढेर पुग्दैन, यहाँको माटोमा बसेर मान्छेसँग कुरा गरेपछि मात्र वास्तविक समस्या बुझिन्छ । भोलि संसदमा कुरा उठाउँदा अनुमानका भरमा होइन, अनुभूतिको आधारमा बोल्नुपर्छ ।”

संखुवासभाको मुढेबजार पुगेर उनले पूर्वी भेगको प्राकृतिक सुन्दरता र रुद्राक्ष खेतीको सम्भावनाबारे चर्चा गरे । संखुवासभा पहिलो पटक पुगेका शाहले उम्मेदवार मिङ्मा शेर्पालाई साक्षी राख्दै भने, “यो पूर्वी भेग कति सुन्दर छ भन्ने कुरा यहाँ आएपछि मात्र थाहा हुन्छ । यहाँको पर्यटन र कृषिलाई विश्वभर पुर्‍याउने वातावरण बनाउनुपर्छ ।”

पूर्वप्रधानमन्त्री केपी शर्मा ओली र बालेन शाह दुवैले आफूलाई ‘भावी प्रधानमन्त्री’का रूपमा प्रस्तुत गरेपछि झापा क्षेत्र नम्बर ५ को चुनावी सरगर्मीले राष्ट्रिय चर्चा पाएको छ । एमाले अध्यक्ष ओली पनि आफ्ना मतदाता भेटेर शुक्रबार नै काठमाडौं फर्किएका थिए ।

भ्रमणका क्रममा शाहलाई धनकुटाको हिले, धरान, इटहरी र विराटनगरमा समर्थकहरूले भव्य स्वागत गरेका थिए । कतै गाडीको छतबाट हात हल्लाउँदै त कतै समर्थकसँग हात मिलाउँदै उनले ‘घण्टी’को पक्षमा माहोल बनाएका थिए । यद्यपि, उनले सञ्चारकर्मीहरूसँग भने कुनै औपचारिक कुराकानी गर्न चाहेनन् ।

शनिबार साँझ विराटनगर विमानस्थल आइपुग्दा बालेनलाई हेर्न समर्थकहरूको ठूलो भिड लागेको थियो । भीड व्यवस्थापन गर्न प्रहरीलाई समेत हम्मेहम्मे परेको थियो । काठमाडौं फर्कनुअघि उनले विमानस्थल नजिकैको पर्पल हेज क्याफेमा रास्वपाका उम्मेदवार र अगुवा कार्यकर्तासँग संक्षिप्त छलफल गरेका थिए ।

रास्वपा कमल गाउँपालिकाका अध्यक्ष केदार चापागाईका अनुसार, बालेन शाहको यो भ्रमणले पूर्वमा पार्टीको पक्षमा उत्साहजनक माहोल सिर्जना गरेको छ । उनी केही समयपछि पुनः झापा क्षेत्र नम्बर ५ लाई नै केन्द्रित गरेर चुनावी अभियानमा फर्कने तयारीमा छन् ।