झापा-५ मा बालेनको ‘क्रेज’ भर्सेस ओलीको ‘विरासत’

झापा । नेपाली राजनीतिको केन्द्रविन्दु मानिने झापा क्षेत्र नम्बर ५ मा यसपटकको चुनावी तापक्रम माघको चिसोमा पनि निकै तातिएको छ । वर्षौंदेखि यो क्षेत्रमा आफ्नो एकछत्र ‘राज’ चलाउँदै आएका एमाले अध्यक्ष केपी शर्मा ओलीकाविरुद्ध काठमाडौंको मेयर पद त्यागेर ‘प्रधानमन्त्री’ बन्ने लक्ष्यसहित मैदानमा उत्रिएका रास्वपा नेता बालेन शाहले चुनाैति दिएका छन् । याे प्रतिस्पर्धाले देशकै ध्यान खिचेको छ ।

मंगलबार उम्मेदवारी दर्ता गरेपछि दुवै हेभिवेट नेताहरू बुधबारदेखि नै आ-आफ्नो रणनीतिसहित मैदानमा उत्रिएका छन् । सातौंपटक चुनावी अग्निपरीक्षा दिन लागेका ओलीलाई यसपटक ‘नयाँ लहर’ को चुनौती सामना गर्न हम्मेहम्मे परिरहेको देखिन्छ ।

दमकमा भाडाको घर लिएर चुनावी कमाण्ड सम्हालेका बालेन शाहलाई भेट्न आउनेहरूको लर्को थामिनसक्नु छ । बालेनको ‘स्व्याग’ ले झापाली युवालाई तानिरहेको छ ।

रोचक त के छ भने, बालेनलाई भेट्न बालबालिकादेखि लौरो टेक्ने वृद्धवृद्धासम्मको भिड छ । कांग्रेस र एमालेका युवा नेताहरूलाई फकाउन बालेनको टोली निकै सक्रिय देखिएको छ । बुधबार दिनभर भेटघाटमा व्यस्त बालेन बिहीबार पाथीभरा मन्दिर दर्शन गर्न जाने तयारीमा छन् ।

बालेनको आगमनले झापाको स्थापित राजनीतिक शक्तिमा ठूलै कम्पन ल्याइदिएको छ । ओलीको गृहनगर दमकमा एमालेको भ्रातृ संगठन राष्ट्रिय युवा संघका नगर अध्यक्ष छवि खतिवडा, उपाध्यक्ष विजय तामाङ र सचिव कमलप्रसाद गैरेले पार्टी परित्याग गरी बालेनको अभियानमा जोडिएका छन् ।

यति मात्र होइन, कांग्रेसका दमक नगर सभापति प्रकाश प्रसाईं र कमल गाउँपालिकाका सचिव महेन्द्र बुढाथोकीले पनि पार्टीको झण्डा त्यागेर रास्वपाको बाटो रोजेका छन् । एमालेको गढ मानिने ठाउँमा आफ्नै कार्यकर्ता बालेनतिर लागेपछि ओली यतिबेला दबाबमा देखिन्छन् ।

उम्मेदवारी दर्ताकै दिन यी दुई नेताबीचको दृश्य फरक देखिन्थ्यो । बालेन ६-७ हजार समर्थकको जुलुससहित तामझामका साथ निर्वाचन अधिकृतको कार्यालय पुग्दा ओली भने सिमित कार्यकर्ता लिएर शान्त शैलीमा पुगेका थिए ।

आफ्नो गढमा असन्तुष्टि बढेको चाल पाएपछि ओलीले बुधबार दमकमा युवा भेला र कार्यकर्ता भेटघाटलाई तीब्रता दिएका छन् । २०४८ सालयता (२०६४ बाहेक) लगातार जित्दै आएका ओलीका लागि यसपटकको चुनाव प्रतिष्ठाको लडाइँ मात्र होइन, आफ्नो ‘विरासत’ जोगाउने चुनौती पनि बनेको छ ।

पूर्वप्राध्यापक मोहन भण्डारीको विश्लेषणमा ओलीलाई यसअघि राप्रपाको दरिलो साथ हुन्थ्यो, तर यसपटक राप्रपा एक्लै लड्दैछ । “ओलीका लागि यो चुनाव विगत जस्तो सहज छैन, बालेनको लहर र पार्टीभित्रकै असन्तुष्टिले उनलाई अप्ठ्यारोमा पार्न सक्छ,” भण्डारी भन्छन् ।

त्यस्तै, राप्रपाका कार्यकर्ता माधव मिश्रको भनाइ झन् रोचक छ: “ओली ओल्डम्यान भए, अहिलेका जनतालाई युवा जोस चाहिएको छ । त्यसैले बालेनको सम्भावना बलियो छ ।” तर, पहिलोपटक भोट हाल्न लागेका गौरीगञ्जका राज साह भने दोधारमा देखिन्छन् । उनी भन्छन्, “बालेनलाई माया त छ, तर भित्रभित्रै केपी ओलीको पकड पनि कमजोर छैन । केपी ओली भनेको केपी ओली नै हुन् ।”

गत निर्वाचनमा ओलीले ५२ हजार ३ सय १९ मत ल्याएर रेकर्ड जित निकालेका थिए । त्यतिबेला रास्वपाका उम्मेदवारले ११ हजार मत मात्र पाएका थिए । तर, यसपटक रास्वपा आफैंले १८ हजार समानुपातिक मत यसअघि नै बटुलिसकेको र त्यसमा बालेनको व्यक्तिगत ‘क्रेज’ थपिँदा नतिजा उथलपुथल हुन सक्ने अनुमान गरिएको छ ।

झापा-५ मा २४ जना उम्मेदवार मैदानमा भए पनि भिडन्त भने यी दुई ‘प्रधानमन्त्रीका दाबेदार’ बीच नै हुने निश्चित छ ।