उर्जाशील पार्टीले छान्यो उम्मेदवार, मोरङ-५ मा अध्यक्ष मण्डल

काठमाडौं । राष्ट्रिय उर्जाशील पार्टी नेपालले आगामी प्रतिनिधि सभा निर्वाचनका लागि मोरङका तीन क्षेत्रमा उम्मेदवारको नाम टुङ्गो लगाएको छ ।

केन्द्रीय समितिको बैठकले मोरङकाे प्रतिनिधिसभा निर्वाचन क्षेत्र नम्बर ५ बाट केन्द्रीय अध्यक्ष योगेन्द्र मण्डललाई उम्मेदवार बनाउने निर्णय गरेको छ । २०७९ सालको प्रतिनिधि सभा निर्वाचनमा मण्डल सोही क्षेत्रबाट ‘चापाकल’ चुनाव चिन्ह लिएर स्वतन्त्र उम्मेदवारका रूपमा निर्वाचित भएका थिए ।

जेनजी आन्दोलनपछि मण्डलकै नेतृत्वमा राष्ट्रिय उर्जाशील पार्टी गठन भएको हो । निर्वाचन आयोगबाट पार्टीले पनि मण्डलको अघिल्लो चुनाव चिन्ह ‘चापाकल’ नै प्राप्त गरेको छ ।

यस क्षेत्रमा मण्डलको प्रतिस्पर्धा पुरानै प्रतिद्वन्द्वीहरूसँग हुने देखिएको छ । नेपाली कम्युनिष्ट पार्टीले शिवकुमार मण्डल र जसपा नेपालले राजकुमार यादवलाई उम्मेदवार बनाएको छ । गत निर्वाचनमा पनि यी तीनै जनाबीच मुख्य प्रतिस्पर्धा भएको थियो, जसमा स्वतन्त्र रहेका योगेन्द्र मण्डल विजयी भएका थिए । 

उर्जाशील पार्टीले मोरङ निर्वाचन क्षेत्र नम्बर २ बाट केन्द्रीय सदस्य मनोजकुमार राजवंशी उम्मेदवार बनाएकाे छ । मोरङ निर्वाचन क्षेत्र नम्बर ३ बाट भुवनकुमार वाग्लेलाई प्रतिनिधि सभा सदस्यको उम्मेदवारका रूपमा अघि सार्ने निर्णय गरेको छ ।

उर्जाशील पार्टीले विकास र सुशासनका मुद्दालाई प्राथमिकतामा राखेर निर्वाचनमा होमिने बताएको छ ।