एमालेको मोरङ र सुनसरी उम्मेदवार छनोट : माेरङमा टिकट लिएनन्, सुनसरीमा खोसियाे

विराटनगर । आसन्न प्रतिनिधिसभा निर्वाचनका लागि नेकपा (एमाले) ले मोरङ र सुनसरीका क्षेत्रहरूमा उम्मेदवार टुंगो लगाउँदा रोचक दृश्यहरू देखिएका छन् । कतै केन्द्रले दिएको टिकट उम्मेदवारले लिन मानेनन् । कतै पार्टी प्रवेश गरेको केही घण्टामै पुराना नेताको टिकट खोसेर नयाँलाई दिइएको छ ।

मोरङ ३ मा दीलिप राईको इन्कार

मोरङ क्षेत्र नम्बर ३ मा एमालेले सुरुमा दीलिप राईको नाम फाइनल गरेको थियो । क्षेत्रीय समितिको सिफारिसमा केन्द्रले टिकट पठाए पनि राईले अन्तिम समयमा चुनाव लड्न अनिच्छा गरे । स्रोतका अनुसार यो क्षेत्रमा नेपाली कांग्रेसका नेता सुनील शर्मासँगको प्रतिस्पर्धा चुनौतीपूर्ण ठानेर उनी पछि हटेका हुन् ।

यो क्षेत्र यसअघि पार्टी सचिव भानुभक्त ढकालको थियो । तर, २०७९ को निर्वाचनमा शर्मासँग पराजित भएपछि ढकाल यसपटक आफ्नो थातथलो तेह्रथुम फर्किएका छन् । दीलिप राईले नमानेपछि एमालेले शिक्षक इरन राईलाई यो क्षेत्रमा चुनावी मैदानमा उतार्ने निर्णय गरेको छ । जिल्ला उपाध्यक्ष सागर थापाले राईको अनिच्छापछि इरनलाई टिकट दिइएको पुष्टि गरे ।

विनोद ढकालको ‘सरप्राइज’ इन्ट्री

एमालेभित्र इतर समूहमा रहेका नेता विनोद ढकालका लागि यसपटकको टिकट अप्रत्याशित रह्यो । क्षेत्र नम्बर १, ४ र ६ बाट सिफारिस भए पनि पार्टी अध्यक्ष केपी शर्मा ओलीसँगको सम्बन्धका कारण उनले टिकट पाउने आश मारेका थिए । तर, आइतबार अबेर अध्यक्ष ओलीले उनलाई क्षेत्र नम्बर ६ बाट उम्मेदवार बनाउने निर्णय गरेपछि ढकाल चुनावी अभियानमा होमिएका छन्  । यस्तै, क्षेत्र नम्बर ५ मा युवा नेता मनोज अग्रवाललाई उम्मेदवार बनाइएको छ ।

मोरङका अन्य क्षेत्र: पुराना र नयाँ अनुहारको सम्मिश्रण

क्षेत्र नम्बर १ मा एमालेले पुनः घनश्याम खतिवडालाई नै विश्वास गरेको छ । यो उनको पाँचौँ संसदीय प्रतिस्पर्धा हो । क्षेत्र नम्बर २ मा रंगेली नगरपालिकाका दुई पटकका मेयर दीलिप बगडियाले पहिलो पटक संघमा प्रतिस्पर्धा गर्दैछन् । क्षेत्र नम्बर ४ मा पूर्वप्रदेश मन्त्री जीवन घिमिरे उम्मेदवार बनेका छन् ।

सुनसरीमा ‘टिकट खोसाखोस’: नवप्रवेशी अन्सारीको उदय

सुनसरी क्षेत्र नम्बर ४ मा भने एमालेभित्र विवाद भएकाे छ । नेपाली कांग्रेस परित्याग गरी आइतबार मात्र एमाले प्रवेश गरेका अबुल हुसैन अन्सारीले प्रवेश गरेको केही घण्टामै टिकट हात पारेका छन् । यसअघि सो क्षेत्रबाट एकल सिफारिस भएका र टिकट पाइसकेका एमाले केन्द्रीय सदस्य जगदीश कुसियतको टिकट खोसिएको हो । कुसियतलाई अब क्षेत्र नम्बर २ बाट उम्मेदवार बनाउने तयारी गरिएको छ, जहाँ यसअघि रेवतीरमण भण्डारीको नाम तय भइसकेको थियो । याे निर्णयले एमालेको आन्तरिक वृत्तमा तीव्र असन्तुष्टि र विवाद सुरु भएको छ ।

धरानमा जनदबाबपछि उम्मेदवार परिवर्तन

सुनसरी क्षेत्र नम्बर १ (धरान) मा पनि एमालेले उम्मेदवार फेरेको छ । सुरुमा सूर्यप्रकाश पन्धाकलाई टिकट दिने निर्णय भए पनि स्थानीय नेता–कार्यकर्ताको चर्को विरोधपछि टिकाराम माङ्देवले टिकट पाएका छन् ।

धरानमा हर्क साम्पाङको श्रम संस्कृति पार्टी र मनोज भट्टराईको उम्मेदवारीले प्रतिस्पर्धालाई थप त्रिपक्षीय र रोचक बनाएको छ ।

सुनसरी क्षेत्र नम्बर ३ मा भने एमालेले पुरानै अनुहार भगवती चौधरीलाई अघि सारेको छ ।