झापा ५ काे चुनावी राप : ओली र बालेनमा प्रधानमन्त्री मोह, एजेन्डाको खडेरी

काठमाडौं । आगामी आम निर्वाचनको मिति नजिकिँदै राजनीतिक वृत्तमा झापा निर्वाचन क्षेत्र नम्बर ५ चर्चाको केन्द्रमा छ । नेकपा एमालेका अध्यक्ष केपी शर्मा ओली र काठमाडौं महानगरपालिकाका प्रमुख बालेन्द्र शाह (बालेन) बीचको सम्भावित प्रतिस्पर्धाले यस क्षेत्रलाई मात्र नभई सिंगो देशको ध्यान खिचेको छ । तर, यसै क्षेत्रबाट विगतमा केपी ओलीलाई पराजित गरेका संविधानसभा सदस्य विश्वदीप लिङ्देनले भने यी दुवै चर्चित अनुहारसँग जनताका वास्तविक एजेन्डा नभएको टिप्पणी गरेका छन् । लिङ्देनले २०६४ सालमा नेकपा माओवादी केन्द्रबाट उम्मेदवार बन्दै ओलीलाई पराजित गरेका थिए ।

हाल नेपाली कांग्रेसमा रहेका लिङ्देनले दुवै नेताहरूमा ‘प्रधानमन्त्री बन्ने’ तीव्र इच्छाशक्ति भए पनि त्यसका लागि आवश्यक पर्ने ठोस मार्गचित्र नभएको बताएका छन् । उनले भने ,”अहिलेको राजनीति केवल पदको वरिपरि घुमेको छ । केपी ओली र बालेन शाह दुवैले आफूलाई भावी प्रधानमन्त्रीको रूपमा प्रस्तुत गरिरहेका छन्, तर उनीहरूका भाषण र योजनामा जनताको दैनिक जीवनसँग जोडिएका आधारभूत समस्याको समाधान छैन।”

लिङ्देनका अनुसार, केवल पपुलिज्म (लोकप्रियतावाद) को भरमा चुनाव जित्ने रणनीतिले लोकतन्त्रलाई बलियो बनाउँदैन । जनताले अहिले महँगी, बेरोजगारी र भ्रष्टाचार विरुद्ध ठोस कार्ययोजना खोजिरहेका छन्, जुन दुवै पक्षबाट स्पष्ट रूपमा आउन सकेको छैन ।

२०६४ सालको संविधानसभा निर्वाचनमा केपी ओलीलाई झापा–५ मा पराजित गरेका लिङ्देनले अहिलेको राजनीतिक परिस्थितिलाई गम्भीर रूपमा विश्लेषण गरेका छन् । उनले पुराना दलका नेताहरूमा अझै पनि “मैले जे गरे पनि जनताले भोट दिन्छन्” भन्ने दम्भ रहेको आरोप लगाए । अर्कोतर्फ, नयाँ शक्ति वा स्वतन्त्रका रूपमा उदाएकाहरूले पनि स्पष्ट नीतिभन्दा बढी भावनात्मक उत्तेजना फैलाएको उनको तर्क छ ।

“चुनाव जित्नुभन्दा अगाडि नै आफूलाई विजयी घोषणा गर्नु र प्रधानमन्त्रीको दाबी गर्नु मतदाताको विवेकको अपमान हो,” लिङ्देनले भने,”अहिलेको ‘जेनजी’ पुस्ताले राजनीतिमा विद्रोह गरिरहेको छ । यो विद्रोह पुराना नेताहरूको भ्रष्टाचार र असक्षमताका विरुद्ध हो । तर, यो विद्रोहलाई सही दिशा दिने एजेन्डाको खाँचो छ।”

झापा–५ मा केपी ओली आफ्नो विरासत जोगाउने दाउमा छन् भने बालेन शाहले राष्ट्रिय स्वतन्त्र पार्टी (रास्वपा) वा स्वतन्त्र समूहबाट उनलाई चुनौती दिने चर्चा छ । यसैबीच, सोही क्षेत्रबाट फेरि निर्वाचन लड्ने तयारीमा रहेका लिङ्देनले आफूलाई ‘जनताको वास्तविक प्रतिनिधि’ का रूपमा उभ्याएका छन् ।