विभाजनपछि निर्वाचन आयाेग पुग्याे कांग्रेसकाे दुवै समूह

काठमाडाैं । नेपाली कांग्रेसको आधिकारिकता विवाद निर्वाचन आयोग पुगेको छ । आयोगले शेरबहादुर देउवाको कार्यसमितिलाई आधिकारिकता दिन्छ कि विशेष महाधिवेशनको नयाँ नेतृत्व गगन थापालाई आधिकारिकता दिन्छ भन्नेमा धेरैको चासो छ ।

बिहीबार माघे संक्रान्तिको सार्वजनिक बिदा परेकाे दिन गगन थापा नेतृत्वकाे टाेली आधिकारिकता दाबी गर्दै निर्वाचन आयाेग पुगेकाे थियाे । थापा नेतृत्वकाे कांग्रेसले पार्टीकाे विवरण अद्यावधिक गर्न निवेदन दिएकाे छ । शुक्रबार शेरबहादुर देउवा नेतृत्वकाे का‌ग्रेस निर्वाचन आयाेग पुगेकाे छ ।

कांग्रेसका महामन्त्रीद्वय गगन थापा र विश्वप्रकाश शर्मासहित ६० प्रतिशतभन्दा बढी प्रतिनिधि सहभागी विशेष महाधिवेशन पक्षधरले मंगलबार निर्वाचन आयोगमा आफ्नो पत्र बुझाइसकेका थिए ।

सभापति शेरबहादुर देउवा पक्षधरको केन्द्रीय कार्यसमिति बैठकले बुधबार महामन्त्रीद्वय थापा र शर्मासहित सहमहामन्त्री फरमुल्लाह मन्सुरलाई कारबाही गरेको पत्र पनि बुधबार आयोगमा पठाएको थियाे ।

आयोगले कांग्रेसका यी दुवै पक्षबाट पत्र प्राप्त भएको पुष्टि गरेको छ। आयोग स्रोतका अनुसार कार्यवाहक प्रमुख निर्वाचन आयुक्त कांग्रेस विवादमा छिट्टै निर्णयमा पुग्ने तयारीमा छन् ।