रवि लामिछानेविरुद्धकाे संगठित अपराध र सम्पत्ति शुद्धिकरण मुद्दा फिर्ता लिने निर्णय

काठमाडौं । पूर्वगृहमन्त्री रवि लामिछानेविरुद्ध चलिरहेका संगठित अपराध र सम्पत्ति शुद्धिकरणको अभियोग फिर्ता लिने महान्यायाधिवक्ता कार्यालयले निर्णय गरेकाे छ ।

महान्यायाधिवक्ता कार्यालयको यो निर्णयसँगै कास्की, रुपन्देही, काठमाडौं र पर्साको सरकारी वकिलको कार्यालय संगठित अपराध र सम्पत्ति शुद्धिकरणको अभियोग फिर्ताकाे प्रकृयामा जानेछ ।

महान्यायाधिवक्ता सबिता भण्डारी बरालले सहकारी ठगीको मुद्दा यथावत् राखेर संगठित अपराध र सम्पत्ति शुद्धिकरणको अभियोग फिर्ता लिनेगरी आरोपपत्र संशोधन गर्ने स्वीकृत दिइएको बताइन् ।

बुधबार अभियोगपत्र संशोधन गर्न स्वीकृत दिने निर्णय भएसँगै जिल्ला अदालत कास्कीमा चलिरहेको सम्पत्ति शुद्धिकरण र संगठित अपराधको मुद्दा फिर्ता हुनेछ । रुपन्देही, काठमाडौं र पर्सामा चलिरहेको संगठित अपराधको मुद्दा पनि फिर्ता हुनेछ ।

मुद्दा फिर्ताकाे निर्णयसँगै लामिछानेलाई चुनाव लड्ने बाटाे खुला भएकाे छ ।