सिमलताल पहिरो : डेढ वर्षपछि भेटियाे गणपति डिलक्स, एन्जल डिलक्सकाे अवस्था अझै अज्ञात

काठमाडौं । नारायणगढ–मुग्लिन सडकखण्डको सिमलतालबाट २०८१ असार २८ गते पहिरोसहित त्रिशूलीमा खसेर बेपत्ता भएकाे दुई बस मध्ये एउटा बस बालुवाले पुरेकाे अवस्थामा भेटिएकाे छ ।

मंगलबार त्रिशूली नदीको किनारमा बालुवाले पुरिएको अवस्थामा गणपति डिलक्सको बस फेला परेको सशस्त्र प्रहरी बलका सहप्रवक्ता तथा डीएसपी शैलेन्द्र थापाले जानकारी दिए । तनहुँको आबुखैरेनी गाउँपालिका–५ द्वोन्द्राङ बेसीनजिकै त्रिशूली नदीको किनारमा पुरिएको अवस्थामा सो गाडीको पार्टपुर्जा फेला परेको उनले बताए ।

काठमाडौंबाट गौरतर्फ जाँदै गरेको बागमती प्रदेश ०३–००१ ख २४९५ नम्बरको गणपति डिलक्स र वीरगञ्जबाट काठमाडौंतर्फ आउँदै गरेको बागमती प्रदेश ०३–००६ ख १५१६ नम्बरको एन्जल डिलक्स सिमलतालबाट पहिरोसहित नदीमा खसेकाे थियाे । गणपति डिलक्समा सवार ३१ जनामध्ये तीनजनाले हाम फालेर ज्यान जोगाएका थिए भने २८ जना बेपत्ता भएका थिए । १४ जनाको शव फेला परेको थियो । अन्य अझै बेपत्ता छन् ।