सीमान्तकृत समुदायबाट राेशनी राष्ट्रियसभा सदस्यको उम्मेदवार

विराटनगर ।  झापाको रैथाने र अति सीमान्तकृत मेचे समुदायबाट राेशनी मेचे राष्ट्रियसभा सदस्यको उम्मेदवार बनेकी छन् । झापा मेचीनगर–१२ (साविक धाइजन–३)मा जन्मिएकी मेचे अहिले कोशी प्रदेशबाट राष्ट्रियसभा सदस्यको उम्मेदवार बनेपछि चर्चामा छन् ।

मेचे समुदाय मुख्यतया झापाको मेचीनगर, बिर्तामोड, हल्दिबारी र कचनकबल क्षेत्रमा बसोबास गर्दछन् । नदी किनारलाई आफ्नो आधार बनाउने यो समुदायलाई सरकारले सीमान्तकृतको सूचीमा राखेर मासिक ४ हजार रुपैयाँ भत्ता समेत उपलब्ध गराउँदै आएको छ ।

त्यही समुदायबाट प्रतिनिधित्व गर्दै रोशनीले राज्यको माथिल्लो सदन (राष्ट्रियसभा)सम्म पुग्ने ऐतिहासिक अवसर पाएकी हुन् । कांग्रेस एमाले र जसपा सम्मिलित गठबन्धन रहेका कारण उनले चुनाव जित्ने निश्चितजस्तै छ ।

रोशनीको शैक्षिक पृष्ठभूमि सबल छ । उनले २०५५ सालमा झापाको बलभद्र माध्यमिक विद्यालयबाट विद्यालय शिक्षा पूरा गरेकी थिइन् । अध्ययनलाई निरन्तरता दिँदै उनले समाजशास्त्रमा स्नातकोत्तर र कानुनमा स्नातक तह उत्तीर्ण गरेकी छन् ।

बौद्धिक रूपमा प्रखर रोशनीले २०७४ सालमा अधिवक्ताको लाइसेन्स लिएर कानुनी क्षेत्रमा समेत आफ्नो पहिचान बनाएकी थिइन् । सीमान्तकृत समुदायबाट कानुन र समाजशास्त्र दुवै विषयमा दख्खल राख्ने उनी निकै कम महिलाहरूमध्ये एक हुन् ।

नेकपा (एमाले)को जनसंगठन लोकतान्त्रिक आदिवासी जनजाति महासंघको केन्द्रीय सदस्य रहेकी रोशनी पार्टीभित्र एक इमानदार र सक्रिय कार्यकर्ताका रूपमा चिनिन्छिन् । उनको कार्यक्षमता र पार्टीप्रतिको निष्ठालाई कदर गर्दै २०७९ सालको प्रतिनिधिसभा निर्वाचनमा उनलाई समानुपातिकतर्फ जिल्ला र प्रदेशबाट सिफारिस गरिएको थियो ।

२ वर्षदेखि उनी एमाले अध्यक्ष तथा पूर्वप्रधानमन्त्री केपी शर्मा ओलीको सचिवालयमा कार्यरत छिन् । प्रधानमन्त्रीको सचिवालयमा रहेर राष्ट्रिय राजनीति र प्रशासनिक कार्यलाई नजिकबाट नियालेकी उनलाई पार्टीले यसपटक राष्ट्रियसभाको उम्मेदवार बनाएको हो ।

रोशनीको राजनीतिक यात्रा सधैँ सहज भने रहेन । यसअघि एमालेको महाधिवेशन प्रतिनिधि बन्ने क्रममा प्राविधिक कारणले योग्यता नपुग्दा उनी पछि परेकी थिइन् । सचिवालयको अनुभव र पार्टी नेतृत्वको विश्वासकै कारण उनले अहिले राष्ट्रियसभाको टिकट पाएकी हुन् ।

वर्तमान राजनीतिक समीकरण अनुसार एमाले र नेपाली कांग्रेसको बलियो गठबन्धन रहेका कारण रोशनी मेचेको राष्ट्रियसभामा जित निश्चित जस्तै देखिएको छ । उनी विजयी भएमा सीमान्तकृत मेचे समुदायबाट राष्ट्रियसभामा पुग्ने पहिलो व्यक्ति बन्ने छिन् । पार्टीले अवसर दिएका कारण सीमान्तकृत समुदायको मुद्दालाई राष्ट्रियसभामा राख्ने उनले बताइन् ।

कोशी प्रदेशमा राष्ट्रियसभा निर्वाचनका लागि कुल ३ सय ६७ मतदाता छन् । ९३ प्रदेशसभा सदस्यको मतभार ५३ र २ सय ७४ स्थानीय तहका प्रमुख–उपप्रमुखको मतभार १९ तोकिएको छ ।

प्रदेश र स्थानीय तह मिलाएर कांग्रेस–एमाले गठबन्धनको कुल मतभार ७ हजार ८ सय ९४ पुग्छ । नेपाली कम्युनिष्ट पार्टी (नेकपा)को १ हजार ६ सय ४२ मतभार छ । गठबन्धनमा रहेको जसपाको १ सय २९ मतभार छ भने राप्रपाको ३ सय ९४ र स्वतन्त्रको ५७ मतभार रहेको छ ।