राष्ट्रियसभा निर्वाचन : सुनिल थापा निर्विराेध, दलित र महिला काेटामा प्रतिस्पर्धा

विराटनगर । राष्ट्रियसभा सदस्य पदका लागि कोशी प्रदेशमा बुधबार मनोनयन दर्ता भएकाे छ । राष्ट्रियसभा चुनावमा नेपाली कांग्रेस र नेकपा (एमाले)बीच गठबन्धनबाट राेशनी मेचे, साेम पाेर्तेल र सुनिल थापाले मनाेनयन दर्ता गरेका छन् । चुनावी गठबन्धनअनुसार उम्मेदवारी दर्ता भएसँगै ‘अन्य’ समूहमा कांग्रेसका सुनील थापा निर्विरोध निर्वाचित हुने अवस्था बनेको छ । दलित र महिला समूहमा भने प्रतिस्पर्धा हुनेछ ।

निर्वाचन कार्यतालिका अनुसार कोशी प्रदेशबाट राष्ट्रियसभामा दलित, महिला र अन्य समूहबाट १–१ गरी ३ जना सदस्य निर्वाचित हुनेछन् ।

एमालेबाट दलिततर्फ सोम पोर्तेल र महिलातर्फ रोशनी मेचेको उम्मेदवारी दर्ता गराएका छन् । पोर्तेलकाे प्रस्तावक एकराज कार्की र समर्थक छवि चुडाल छन् भने मेचेका प्रस्तावक शोभा चेम्जोङ र समर्थक सृजना राई छन् । अन्य समूहबाट कांग्रेसका सुनील थापाले उम्मेदवारी दर्ता गराएका छन् । थापाका प्रस्तावक उद्धव थापा र समर्थक रेगिना भट्टराई छन् ।

उक्त समूहमा थापाबाहेक अरु कुनै उम्मेदवारको मनोनयन नपरेपछि उनी एकल उम्मेदवार बनेका हुन् । निर्वाचन अधिकृतको कार्यालयका अनुसार औपचारिक प्रक्रिया पूरा भएपछि पुस २७ गते थापा निर्विरोध निर्वाचित भएको घोषणा गरिनेछ ।

नेपाली कम्युनिष्ट पार्टी (नेकपा)ले दलित र महिला समूहमा आफ्ना उम्मेदवार मैदानमा उतारेको छ । नेकपाबाट दलिततर्फ खेमराज सुन्दास र महिलातर्फ नमिता न्यौपानेले मनोनयन दर्ता गराएका छन् ।

न्यौपानेका प्रस्तावक गणेश उप्रेती र समर्थक गीता तिम्सिना छन् भने सुन्दासका प्रस्तावक सपना परियार र समर्थक नमोनारायण माझी रहेका छन् । तर, अन्य समूहका लागि तय गरिएका उम्मेदवार हेमराज घिमिरे समयमै निर्वाचन अधिकृतको कार्यालय नपुग्दा उक्त समूहमा नेकपाको उम्मेदवारी दर्ता हुन सकेन ।

राष्ट्रियसभाको रिक्त १८ पदका लागि देशभर माघ ११ गते निर्वाचन हुँदैछ । तीमध्ये कोशी प्रदेशबाट ३ जना निर्वाचित हुनेछन् ।

कोशी प्रदेशमा राष्ट्रियसभा निर्वाचनका लागि कुल ३ सय ६७ मतदाता छन् । ९३ प्रदेशसभा सदस्यको मतभार ५३ र २ सय ७४ स्थानीय तहका प्रमुख–उपप्रमुखको मतभार १९ तोकिएको छ ।

प्रदेश र स्थानीय तह मिलाएर एमालेको ४ हजार २ सय १०, कांग्रेसको ३ हजार ६ सय ८४ र माओवादी केन्द्र तथा एकीकृत समाजवादीसहितको नेकपाको १ हजार ६ सय ४२ मतभार छ । कांग्रेस–एमाले गठबन्धनको कुल मतभार ७ हजार ८ सय ९४ पुग्छ । यही गठबन्धनमा रहेको जसपाको १ सय २९ मतभार छ भने राप्रपाको ३ सय ९४ र स्वतन्त्रको ५७ मतभार रहेको छ ।