नेतालाई भाग पुर्याउन कोशीमा मन्त्रिपरिषद् पुनर्गठन

विराटनगर । कोशी प्रदेशका मुख्यमन्त्री हिक्मत कार्की मन्त्रिपरिषद् पुनर्गठन गरेका छन् । मंगलबार कांग्रेस-एमाले गठबन्धनकाे सरकारमा रहेका सबै मन्त्री हटाएर नयाँ नियुक्त गरेका हुन् ।

नेताहरूका अनुसार मन्त्रीपरिषद्का सदस्यको कार्यसम्पादनमा आएको गिरावटका कारण गरिएको सुधार होइन, सत्ता साझेदार दलभित्रका आकांक्षी सांसदहरूलाई ‘भाग पुर्याउन’ गरिएको राजनीतिक व्यवस्थापन मात्रै हो ।

कोशीको मन्त्रिपरिषदमा रहेका एमालेका रेवतीरमण भण्डारी आन्तरिक मामिला तथा कानुन, राम राना आर्थिक मामिला, एकराज कार्की खानेपानी र पाँचकर्ण राई सामाजिक विकास मन्त्री थिए । राज्यमन्त्री सिर्जना राई थिइन् । उनीहरु सबै फिर्ता भए ।

कांग्रेसबाट भूपेन्द्र राई भौतिक पूर्वाधार र स्वास्थ्य, सदानन्द मण्डल पर्यटन र खगेनसिं हांगाम कषि मन्त्री थिए,भूमि प्रसाद राजवंशी भौतिक पूर्वाधार राज्यमन्त्री थिए । उनीहरु पनि ब्याक भए ।

सेट नै फिर्ता गरेर मुख्यमन्त्री कार्कीले एमालेबाट विदुर लिङथेपलाई आर्थिक मामिला, चिन्तन (तिलचन) पाठकलाई खानेपानी, इन्द्रमणि पराजुलीलाई आन्तरिक मामिला तथा कानुन र रामकुमार महतोलाई सामाजिक विकास मन्त्री बनाएका छन् । उमाकान्त गौतमलाई आन्तरिक मामिला तथा कानुन मन्त्रालयको राज्यमन्त्रीको ‘चिठ्ठा’ परेको छ । उनी गर्तवर्ष पनि राज्यमन्त्री बन्ने तयारीमा थिए, तर अन्तिमममा ब्याक भए ।

कांग्रेसबाट प्रदीप सुनुवार भौतिक पूर्वाधार, भीम पराजुली पर्यटन वन, मानबहादुर लिम्बू स्वास्थ्य र इस्राइल मन्सुरी उद्योग तथा कृषि तथा सहकारी मन्त्री बनेका छन् । शोभा चेम्जोङलाई भौतिक पूर्वाधार राज्यमन्त्री बनाइएको छ ।

भागवण्डा पुर्याउनका लागि फेरबदल भएका मन्त्रीको कार्यअवधि एक वर्षको हुनेछ । बहिर्गमनमा परेका कांग्रेसका मन्त्री २०८१ भदौ २८ गते मन्त्री बनेका थिए । एक वर्ष पुगेपछि उनीहरुलाई फिर्ता बोलाउने गृहकार्य सुरु भएको थियो ।

एमालेबाट २०८१ जेठ पहिलो साता रामबहादुर मगर, एकराज कार्की, पाँचकर्ण राई, र लिलाबल्लभ अधिकारी मन्त्री बनेका थिए । विवादमा परेर अधिकारीले राजीनामा दिएपछि २०८१ मंसिरमा रेवतीरमण भण्डारी मन्त्री बनेका थिए ।सरकारमा रहेका मन्त्रीहरू पटक पटक विवादमा मुछिएका थिए । हाङगामले गृहजिल्ला ताप्लेजुङ पुगेर पाथिभरा क्षेत्र विकास समिति अध्यक्ष रक्की थेबेलाई कुटपिट गरेपछि विवादमा तानिएका थिए । पर्यटन, वन तथा वातावरण मन्त्री हुँदा सदानन्द मण्डल क्यूआर कोड विवादमा मुछिएका थिए । सचिवालयका कर्मचारीमार्फत कार्यालय प्रमुखलाई बैंक खाताको क्यूआर पठाएर सहयोग मागेको आरोप उनीमाथि लागेकाे थियाे । तर उनले अस्विकार गर्दै अाएका थिए ।

सरकारको मुख्य काम जनतालाई सेवा प्रवाह डेलिभरी गर्ने हुनुपर्नेमा सत्ता टिकाउन र असन्तुष्ट सांसदहरूलाई खुसी पार्नकै लागि मन्त्रिपरिषद् पुनर्गठनको शृङ्खला चलिरहेको नेताहरु बताउँछन् । मुख्यमन्त्री कार्यालय स्रोतका अनुसार यो केवल ‘अनुहार फेर्ने’ काम मात्र हो । ‘मन्त्रालय उही हुन्, नीति उही हो, केवल नेताहरूको व्यवस्थापन गर्न अनुहार फेरिएका हुन्,’ स्रोतले भन्यो ।

प्रतिपक्षको टिप्पणी : असफलता लुकाउने प्रयास

कोशी प्रदेशका प्रमुख प्रतिपक्षी दल नेकपा (माओवादी केन्द्र) का संसदीय दलका नेता इन्द्रबहादुर आङ्बोले मन्त्रिपरिषद् पुनर्गठनलाई‘असफल सरकारको असफलता लुकाउने नाटक’ भएको बताए ।

‘सरकार पूर्ण रूपमा असफल भयो, हिजोको टिम विवादरहित रहेन । अहिलेको हेरफेर भागबण्डा पुर्‍याउन र नेता व्यवस्थापन गर्न मात्रै हो,’ नेता आङ्बोले भने, ‘जग नै पुरानो र कमजोर भएपछि मान्छे फेरेर मात्रै सरकार सफल हुँदैन ।’

असफल सरकारबाट प्रदेशबासीले केही आस गर्न नसक्ने उनको भनाई छ । ‘उहाँहरुले जम्माजम्मी भागवण्डा पुर्याउने र नेता व्यवस्थापन गर्ने बाहेक अन्य काम भएको छैन,’ उनले भने,‘यो सरकार असफल भएर सेट परिवर्तन भएको हो, मान्छे फेरेर परिवर्तन हुँदैन, जग पुरानै भएका कारण सरकार बन्ने त असफल नै हो ।’