ग्रामथान गाउँपालिकामा विवाद : उपाध्यक्षले लगाएकाे ताला अध्यक्षका समर्थकले फुटाए

विराटनगर । मोरङको ग्रामथान गाउँपालिकामा अध्यक्ष र उपाध्यक्षबीचको शक्ति संघर्षले उग्र रूप लिएको छ । बिहीबार अध्यक्ष नमोनारायण माझी र उपाध्यक्ष गुणवतीदेवी थारु पक्षबीचको विवादका कारण पालिका कार्यालय परिसर तनावग्रस्त बन्याे ।

अध्यक्ष माझीले एकलौटी ढंगले काम गरेको आरोप लगाउँदै उपाध्यक्ष थारुले बुधबार लेखा शाखामा तालाबन्दी गरेकी थिइन् । सो ताला खोल्न माग गर्दै पुगेका अध्यक्षका समर्थक र स्थानीयले बिहीबार लेखा शाखाको ताला फुटाएका छन् । ताला फुटाउने क्रममा दुई पक्षबीच भनाभन र हातहालाहाल समेत भएको थियो । प्रदर्शनकारीहरूले आफूहरू अध्यक्षकाे कार्यकर्ता नभई पालिकाको सेवा ठप्प हुँदा मर्कामा परेका स्थानीय भएको दाबी गरेका छन् ।

प्रहरीले दुवै पक्षलाई संयमित राख्न र थप अप्रिय घटना हुन नदिन बीचमा बसेर स्थितिलाई नियन्त्रणमा लिएको थियो ।

उपाध्यक्ष गुणवतीदेवी थारुले अध्यक्ष माझीले गाउँसभा एकलौटी रूपमा सम्पन्न गरेको र बजेट किताबमा आफ्नो मन्तव्य समेत समावेश नगरेको आरोप लगाएकी छन् । बजेट पुस्तिकामा अध्यक्ष र प्रमुख प्रशासकीय अधिकृतको मात्र मन्तव्य राखिएको भन्दै उनले असन्तुष्टि जनाउँदै आएकी छन् ।

यता अध्यक्ष माझीले भने आफूलाई काम गर्न नदिने उद्देश्यले उपाध्यक्ष र एमालेबाट निर्वाचित जनप्रतिनिधिहरूले अवरोध सिर्जना गरेको बताउँदै आएका छन् । गत वर्ष मंसिरमा भएको उपनिर्वाचनमा नेकपा माओवादी केन्द्रबाट निर्वाचित भएका माझीले एमालेको बहुमत रहेको कार्यपालिकामा आफूलाई घेराबन्दी गरिएको गुनासो गर्दै आएका छन् ।

जनप्रतिनिधिबीचकाे विवाद कार्यालयभित्र मात्र सीमित छैन । गत पुस ९ गते विराटनगरको मुख्य सडकमा गाडीको साँचो खोस्ने विषयलाई लिएर अध्यक्ष र उपाध्यक्षबीच सार्वजनिक रूपमै विवाद भएको थियो । जिल्ला प्रशासन कार्यालय नजिकै उपाध्यक्ष थारुले अध्यक्षले प्रयोग गरिरहेको गाडीको साँचो नियन्त्रणमा लिएपछि दुई पक्षबीच सडकमै बाझाबाझ भएको थियो । जनप्रतिनिधिहरूको व्यक्तिगत र राजनीतिक टकरावका कारण ग्रामथान गाउँपालिकाको प्रशासनिक कार्यहरू प्रभावित भइरहेका छन् ।