मोरङमा फेरि गोली चल्यो, एम्बुलेन्स चालकसहित दुई पक्राउ

विराटनगर । गाँजा कारोबारीलाई नियन्त्रणमा लिन प्रहरीले आइतबार राति पनि गोली चलाएको छ । शनिबार राति मोरङको जहदा गाउँपालिका–२ तारिगामामा एक राउण्ड हवाइ फायर गरी गाँजा ओसारपसारमा संलग्न भारतीय नागरिकलाई नियन्त्रणमा लिएको थियो ।

आइतबार राति करिब साढे ११ बजे मोरङको केराबारी गाउँपालिका–५ लाफा टोलमा प्रहरीले हवाई फायर गरी एम्बुलेन्समा लोड गरिएको गाँजा नियन्त्रणमा लिएको हो । प्रहरीले दुई जनालाई पनि पक्राउ गरेको छ ।

धनकुटाबाट मोरङ तर्फ आउदै गरेको प्रदेश १–०६–००१ झ ०००४ नम्बरको एम्बुलेन्सलाई प्रहरीले केराबारी–५ लाफा टोलमा प्रहरीले रोक्न खोजेको थियो । प्रहरीलाई देख्नसाथ एम्बुलेन्स चालक धनकुटाको सहिदभूमि गाउँपालिका–६ का ३५ वर्षीय निश्चल राई र एम्बुलेन्समा सवार साँगुरीगढी गाउँपालिका–२ का २० वर्षीय खगेन्द्र लिम्बू भागेका थिए । त्यसपछि प्रहरीले चाइनिज पेस्तोलबाट १ राउण्ड हवाई फायर गरेको थियो । मोरङ प्रहरी प्रमुख प्रहरी उपरीक्षक कवित कटवालका अनुसार एम्बुलेन्समा सवार दुवै पक्राउ परेका छन् ।

एम्बुलेन्समा लोड गरिएको गाँजा ४८० किलो हाराहारी रहेको प्रहरीले जनाएको छ ।

प्रहरीले जहदा गाउँपालिका–२ तारिगामाबाट गोली चलाएर ३ सय ३० किलो गाँजासहित भारीय नागरिक २४ वर्षीय अबुल हसन र ३० वर्षीय सोहेल खानलाई पक्राउ गरेको थियो ।