निर्वाचन आचारसंहिता स्वीकृत, माघबाट कार्यान्वयनमा आउने

काठमाडौं । निर्वाचन आयोगले निर्वाचन आचारसंहिता, २०८२ स्वीकृत गरेको छ । आयोगको बैठकले आचारसंहिता स्वीकृत गरेकाे हाे । आचारसंहिता स्वीकृत गरेसँगै दल, उम्मेदवार र सम्बन्धित सबै निकायलाई त्यसको कडाइका साथ पालना गर्न आयाेगले आग्रह गरेको छ ।

कार्यवाहक प्रमुख निर्वाचन आयुक्त रामप्रसाद भण्डारीका अनुसार स्वीकृत आचारसंहिता माघ पहिलो साताबाट कार्यान्वयनमा जानेछ । फागुन २१ गतेलाई प्रतिनिधिसभा सदस्य चुनाव तोकिएको छ ।

आयोगले निर्वाचन आचारसंहिता, २०८२ को मस्यौदा तयार पारेर सरोकारवालासँग राय सुझाव मागेको थियो । आएका सुझावसमेत समेटेर आचारसंहिता स्वीकृत गरिएको भण्डारीले बताए । यसपटकको आचारसंहिताको दायरा फराकिलो बनाएको आयोगले दाबी गरेको छ ।

आयोगका अनुसार आचारसंहिता निर्वाचन प्रक्रियालाई स्वच्छ, निष्पक्ष र पारदर्शी बनाउने उद्देश्यले तयार गरिएको हो । नयाँ आचारसंहितामा राजनीतिक दल र उम्मेदवारलाई थप जिम्मेवार बनाउने व्यवस्था गरिएको छ ।

विशेषगरी दल वा उम्मेदवारले निर्वाचन घोषणापत्रमा गरेका प्रतिबद्धताअनुसारको कार्यप्रगति प्रत्येक वर्ष सर्वसाधारणको जानकारीका लागि सार्वजनिक गर्नुपर्ने व्यवस्था समेटिएको छ । यसलाई निर्वाचनका बेला मात्रै नभएर निर्वाचित भइसकेपछि पनि राजनीतिक उत्तरदायित्व सुनिश्चित गर्ने महत्वपूर्ण प्रावधानका रूपमा हेरिएको छ ।

आचारसंहिता लागू भएको अवधिमा त्यसको उल्लंघन गर्नेहरू आयोगको निगरानीमा पर्नेछन् । अनुगमनका क्रममा कसैले आचारसंहिताविपरीत काम गरेको पाइएमा निर्वाचन आयोगले उल्लंघनकर्ताको नामसहितको विवरण सार्वजनिक गर्ने व्यवस्था छ ।