विराट ट्रेड एक्स्पाे सुरू

विराटनगर । मोरङ उद्योग व्यापार संघको आयोजनामा बुधबारदेखि ‘विराट ट्रेड एक्स्पो’ सुरु भएको छ । जेनजी आन्दोलनपछि सुस्ताएको आर्थिक गतिविधिलाई पुनः चलायमान बनाउने अपेक्षासहित एक्स्पो आयोजना गरिएको हो ।

विराटनगर–१, शान्ति चोकमा आयोजित अन्तर्राष्ट्रियस्तरको यस व्यापार मेलाको उद्घाटन अर्थमन्त्री रामेश्वर खनालले गरे । उद्घाटन समाराेहलाई सम्बाेधन गर्दै उनले संकटका बेला निजी क्षेत्र आफैं जुर्मुराएर अघि बढेको बताए ।

उनले संसद्को अनुपस्थितिमा कानुन निर्माण गर्ने अभ्यासले लोकतन्त्रलाई बलियो नबनाउने धारणा राखे । उनले भने, ‘यो सरकारलाई असीमित म्याण्डेट छैन। कानुन संसद्को अनुपस्थितिमा बन्न सक्दैन र बनाउनु पनि हुँदैन भन्ने मेरो लोकतान्त्रिक विश्वास हो ।’

उनले अध्यादेशको आधारमा शासन चलाउनु असल अभ्यास नभएको समेत उल्लेख गरे ।

सीमित म्याण्डेट र संस्थागत अभावका बाबजुद निजी क्षेत्रको आशालाई सम्बोधन गर्न सरकारले प्रयास गर्नुपर्नेमा उनले जोड दिए । आर्थिक संकटका बेला निजी क्षेत्रले देखाएको धैर्यताको प्रशंसा गर्दै उनले व्यवसायीहरू आफैँ जुर्मुराएर अघि बढ्न खोज्नु अर्थतन्त्रका लागि सुखद पक्ष भएको बताए ।

उद्घाटन समारोहमा बोल्दै मोरङ उद्योग व्यापार संघका अध्यक्ष अनुपम राठीले स्वदेशी उत्पादनको प्रवर्द्धन गर्ने र नेपाली बजारलाई अन्तर्राष्ट्रिय स्तरसम्म जोड्ने मुख्य लक्ष्यका साथ एक्स्पोको सुरुवात गरिएको बताए ।

पुस १९ गतेसम्म सञ्चालन हुने यस मेलामा नेपालका घरेलु, साना, मझौला तथा ठूला उद्योगका उत्पादनहरू प्रदर्शनीमा राखिएका छन् । एक्स्पोमा जम्मा २३० वटा स्टलहरू रहेका छन्, जसमा नेपालका साथै छिमेकी मुलुकहरू भारत, बंगलादेश र पाकिस्तानका उत्पादनहरू समेत समावेश छन् ।

प्रदर्शनीमा कृषिजन्य वस्तु, औद्योगिक सामग्री, शिक्षा, स्वास्थ्य, सूचना प्रविधि, पर्यटन र सेवा क्षेत्रसँग सम्बन्धित सामग्रीहरूको स्टल राखिएको छ ।

एक्स्पो अवधिभर विभिन्न विषयगत (थिमेटिक) सेसन पनि सञ्चालन गरिने आयोजकले जनाएको छ । जसमा स्टार्टअप, साना तथा मध्यम उद्यम , पर्यटन, सूचना प्रविधि, साइबर सुरक्षा, कर तथा लेखा प्रणाली र महिला उद्यमशीलता जस्ता महत्त्वपूर्ण विषयमा छलफल हुनेछ । मेला अवधिभर २ लाखभन्दा बढी दर्शकले प्रत्यक्ष अवलोकन गर्ने र करिब २५ देखि ३० करोड रुपैयाँसम्मको आर्थिक कारोबार हुने अपेक्षा राखिएको छ ।